بڈگام میں نامعلوم بندوق برداروں نے بینک لوٹ لیا

ضلع بڈگام کے چاندی پورہ علاقے میں بندوق برداروں نے دن دھاڑے بندوق کی نوک پر جموں کشمیر بینک سے ڈھائی لاکھ کی رقم لوٹ لی۔ اس کے علاوہ بندوق بردار سکیورٹی گارڈس کی بندوق بھی لوٹ کر ساتھ لے گئے۔

بتایا جا رہا ہے کہ پہلے تین بندوق بردار آئے اور دروازہ کھٹکھٹایا جب سکیورٹی گارڈس نے انہیں روکنے کی کوشش کی تو بندوق برداروں نے گولیاں چلائیں اور ایک ساتھ پانچ بندوق بردار بینک کے اندر گھس آئے۔

بینک کے ملازمین نے کہا کہ بندوق برداروں نے پہلے سی سی ٹی وی کو توڑ دیا اور پھر ملازمین کو گولیاں چلا کر ڈرایا اور اس کے بعد بینک میں رکھی گئی رقم کو لوٹ لیا۔ پولیس نے موقع پر پہنچ کر معاملے کی جانچ شروع کردی ہے۔

پولیس جب تک موقع پر پہنچی تب تک نامعلوم بندوق بردار وہاں سے فرار ہوچکے تھے۔ ابھی تک یہ معلوم نہیں ہو پایا ہے کہ یہ بندوق بردار کون تھے۔ مقامی لوگوں کا کہنا ہے کہ جب انہوں نے گولیوں کی آوازیں سنی تو وہ کافی خوف زدہ ہوئے۔ اس کے بعد وہ موقع واردات پر پہنچ گئے۔ واردات کی خبر کے بعد بینک کے اعلیٰ عہدیدار بھی وہاں پہنچے ہیں۔