اترپردیش میں اسمبلی انتخابات کے دوسرے مرحلے کی ووٹنگ صبح 7 بجے سے شروع ہو گئی ہے۔ وزیر اعظم نریندر مودی، وزیر داخلہ امت شاہ اور ریاست کے وزیر اعلی یوگی آدتیہ ناتھ نے سبھی سے ووٹ ڈالنے کی اپیل کی ہے۔ وزیر اعظم نریندر مودی نے ٹویٹر پر لکھا کہ اتر پردیش اسمبلی انتخابات کے دوسرے دور مرحلے کے ساتھ ساتھ آج اتراکھنڈ اور گوا کی تمام اسمبلی سیٹوں کے لیے ووٹنگ ہو رہی ہے۔ میں تمام ووٹرز سے درخواست کرتا ہوں کہ وہ جمہوریت کے اس مقدس تہوار میں شرکت کریں اور ووٹنگ کا نیا ریکارڈ بنائیں۔ یاد رکھیں پہلے ووٹنگ، پھر کوئی اور کام۔ PM Modi Urges People To Vote In Record Numbers
وزیر داخلہ امت شاہ نے لکھا کہ میں اتر پردیش کے دوسرے مرحلے کے تمام ووٹروں سے اپیل کرتا ہوں زیادہ ووٹ ڈالیں۔ آپ کا ایک ووٹ ریاست کے روشن اور محفوظ مستقبل کا فیصلہ کرے گا۔ اس لیے خود بھی ووٹ دیں اور دوسروں کو بھی ووٹ دینے کی ترغیب دیں۔
اتر پردیش کے وزیر اعلی یوگی آدتیہ ناتھ نے بھی ریاست کے دوسرے مرحلے میں نو اضلاع کے 55 اسمبلی حلقوں کے لوگوں سے ووٹ ڈالنے کی اپیل کی ہے۔ انہوں نے ٹویٹ کے ذریعے لکھا کہ یوپی اسمبلی انتخابات-2022 کے دوسرے مرحلے کے تمام معزز ووٹروں کو دل کی گہرائیوں سے مبارکباد۔ ووٹنگ کے حقوق اور فرائض کے ساتھ ساتھ قوم پرستی بھی ہے۔ فساد سے پاک اور خوف سے پاک نئے اتر پردیش کی ترقی کے سفر کو جاری رکھنے کے لیے ووٹنگ کو یقینی بنائیں۔
یوپی میں 2022 کے اسمبلی انتخابات کے دوسرے مرحلے کی ووٹنگ جاری ہے۔ پیر کو ریاست کے نو اضلاع کی 55 سیٹوں پر ووٹنگ ہو رہی ہے۔ ووٹنگ کا عمل صبح سات بجے سے شروع ہوا اور شام چھ بجے تک جاری رہے گا۔ اس مرحلے میں 2.02 کروڑ رائے دہندگان کل 586 امیدواروں کی قسمت کا فیصلہ کریں گے۔
چیف الیکٹورل آفیسر اجے کمار شکلا نے کہا کہ' 1.08 کروڑ مرد، 94 لاکھ خواتین اور 1,269 تیسری جنس اپنے ووٹ کا استعمال کر سکتے ہیں۔ اس مرحلے میں سہارنپور، بجنور، مرادآباد، امروہہ، سنبھل، مرادآباد، بریلی، بدایوں اور شاہجہاں پور اضلاع میں ووٹنگ ہورہی ہے۔ ان اضلاع میں 12,544 پولنگ اسٹیشن اور 23,404 پولنگ مقامات بنائے گئے ہیں۔
پولنگ اسٹیشنوں پر کووڈ پروٹوکول پر عمل کرنے کے لیے رہنما خطوط دیے گئے ہیں۔ کافی سینیٹائزر، ماسک، دستانے، فیس ماسک، تھرمل سکینر، فیس شیلڈز، پی پی ای کٹس اور صابن پانی کا انتظام کیا گیا ہے۔ دوسرے مرحلے میں سہارنپور، بجنور، مرادآباد، سنبھل، امروہہ، رام پور، بدایوں، بریلی اور شاہجہاں پور اضلاع میں پولنگ جاری ہے۔
