پیرول پر جیل سے رہا ہونے والے شرپسندوں کو ہفتے کے روز اُتر پردیش کے ضلع گوتم بدھ نگر نوئیڈا کی کوتوالی سورج پور پولیس نے ایک خاتون سے سونے کی زنجیر لوٹنے کی کوشش و دیگر واردات کے الزام میں گرفتار کیا ہے۔
دونوں ملزمان کووڈ 19 کے دوران پیرول پر جیل سے باہر آئے تھے۔
پولیس نے لٹیروں سے ایک زنجیر اور ایک چین کا ٹکڑا، ایک پستول اور چاقو برآمد کیا ہے۔
کوتوالی سورج پور پولیس کے مطابق 31 جولائی کو دو موٹر سائیکل سوار شرپسندوں نے گریٹر نوئیڈا کے سیکٹر ڈیلٹا 2 میں ایک خاتون سے زنجیر لوٹنے کی کوشش کی تھی اور اس دن سیکٹر الفا -1 میں ایک اورخاتون سے زنجیر لوٹ لی گئی تھی۔
4 جون کو موٹر سائیکل سوار شرپسندوں نے پیراماؤنٹ سوسائٹی کے قریب ایک شخص سے زنجیر لوٹ لی تھی سی سی ٹی وی فوٹیج میں شرپسندوں کی یہ واردات محفوظ ہو گئی تھی۔
ہفتہ کو پولیس نے شرپسندوں کو گلستان پور اے ٹی ایس گول چکر کے قریب سے گرفتار کیا۔
ملزمان کی شناخت دانش جعفرآباد دہلی اور آصف جنتا فلیٹ آدرش نگر چائی 4 سیکٹر گریٹر نوئیڈا کے طور پر ہوئی ہے۔
پولیس نے بتایا کہ کورونا کے سال میں 7 برس سے کم سزا والے قیدیوں کو پیرول پر رہا کردیا گیا تھا۔
جیل سے باہر آنے کے بعد ان شرپسندوں نے لوٹ کی وارداتیں شروع کر دیں۔ گرفتار شرپسندوں کے خلاف گریٹر نوئیڈا ، نوئیڈا ، غازی آباد ، لونی اور دہلی سمیت کئی شہروں میں ڈکیتی ، چوری سمیت مختلف مجرمانہ دفعات کے تحت 18 سے زائد مقدمات درج ہیں۔
مزید پڑھیں:آگرہ سے فرار انعامی بدمعاش پولیس تصادم کے بعد نوئیڈا میں گرفتار
آصف غازی آباد وجے نگر تھانے کا گینگسٹر بدمعاش ہے۔ پوچھ گچھ کے دوران شرپسندوں نے بتایا کہ ضمانت کے پیسے جمع کر نے کے لئے لوٹ کی واردات کو انجام دے رہے تھے۔
