عام آدمی پارٹی سات اپریل سے پنجاب میں بجلی کی شرح میں اضافہ کے خلاف بڑی تحریک شروع کرے گی اور دہلی کی طرز پر پنجاب کے لوگوں کو بھی مفت بجلی فراہم کرنے کے لیے کیپٹن امریندر حکومت کو مجبور کرے گی۔
پارٹی کے ریاستی صدر اور رکن پارلیمان بھگونت مان نے بدھ کو جالندھر میں پریس کانفرنس میں کہا کہ پنجاب حکومت کی غلط پالیسیوں کی وجہ سے پنجاب میں بجلی کی شرح بہت زیادہ ہیں۔ اس سے لوگوں کو بہت پریشانی ہورہی ہے۔
پنجاب حکومت بجلی کی شرح کم کرنے کے بجائے دن بدن بڑھا رہی ہے۔ اس لیے عام آدمی پارٹی اس کے خلاف پورے پنجاب میں تحریک کرے گی اور کیپٹن سرکار کو بجلی کی شرح کم کرنے کے لیے مجبور کرے گی۔
انہوں نے کہاکہ یہ تحریک ہر گاوں اور قصبے تک پہنچے گی۔ ہمارے کارکن بجلی کے بلوں کے بارے میں معلومات حاصل کرنے کیلئے گھر گھر جائیں گے اور مہنگی بجلی کے خلاف بجلی کے بل جلائے جائیں گے۔
انہوں نے کہا کہ پہلے اکالی دل کی حکومت اور اب کانگریس حکومت نے اپنے ذاتی مفادات کے لئے پرائیویٹ کمپنیوں کے ساتھ مہنگا بجلی معاہدہ کیا۔
عام آدمی پارٹی کے پنجاب انچارج جرنیل سنگھ نے کہا کہ خواہ پنجاب حکومت ریاست کی تین پرائیویٹ تھرمل کمپنیوں سے بجلی نہیں خریدے گی لیکن حکومت کو ان تھرمل کمپنیوں کو کروڑوں روپے کی ادائیگی کرنی ہوگی۔
انہوں نے کہا کہ پنجاب میں بجلی پیدا کی جارہی ہے لیکن پھر بھی مہنگی بجلی دی جارہی ہے جبکہ دہلی میں کوئی تھرمل پاور نہیں ہے لیکن دہلی کی اروند کیجریوال حکومت باہر سے بجلی خریدنے کے بعد بھی لوگوں کو مفت بجلی دے رہی ہے۔ پنجاب میں بھی دہلی کی طرح مفت بجلی دینے کیلئے تحریک شروع کی جائے گی۔
یو این آئی
