آسام حکومت نے تمام مسافرین کے لیے یہ لازمی کیا ہے کہ وہ ایئرپورٹ پر اترنے کے بعد ایک تیز اینٹیجن ٹیسٹ سے گزریں اگر یہ منفی آئے تب بھی ایک آر ٹی پی سی آر ٹسٹ کیا جائے جس کی قیمت 500 روپئے ہوگی۔
کچہار ضلع کے ایڈیشنل ڈپٹی کمشنر سمیت ستاون نے کہا کہ ملک کے مختلف حصوں سے 6 جہازوں کے ذریعہ 690 مسافرین یہاں پہنچے تھے۔ ان سب کو کورونا وائرس ٹیسٹ کے لیے ٹکول ماڈل ہسپتال پہنچنا تھا۔
ان میں سے 300 افراد نے 500 روپیوں کی ادائیگی کے مسئلہ پر ہنگامہ کھڑا کردیا اور فرار ہوگئے۔ عہدیدار نے کہا کہ انہوں نے قواعد کی خلاف ورزی کی ہے۔ ہمارے پاس ان کی معلومات ہیں اور ہم انہیں تلاش کررہے ہیں۔
انہوں نے کہا کہ 189 مسافرین کا ٹیسٹ کیا گیا جس میں سے 6 مثبت پائے گئے جبکہ کئی مسافرین کو استثنی دیا گیا کیونکہ وہ پڑوسی ریاستوں میزورم ، منی پور ، تریپورہ جارہے تھے۔
آسام کی حکومت نے بدھ کے روز اعلان کیا تھا جو مسافرین بیرونی ریاستوں سے آرہے ہیں۔ انہیں لازمی 7 دن کے قرنطینہ سے گذرنا ہوگا۔ ریاست میں تاحال 2 لاکھ 29 ہزار 138 افراد کورونا سے متاثر ہوچکے ہیں جبکہ 1 ہزار 150 افراد کی موت ہوچکی ہے۔
