لکھنؤ: اترپردیش کی راجدھانی لکھنؤ میں ماہ ربیع الاول کی تیاریوں کے سلسلے میں ایک میٹنگ لکھنؤ کے اسلامک سینٹر آف انڈیا میں مولانا خالد رشید فرنگی محلی کی صدارت میں منعقد کی گئی۔ میٹنگ میں یہ فیصلہ کیا گیا ہے کہ رواں برس یکم تا 10 ربیع الاول اسلامک سینٹر آف انڈیا کی زیر نگرانی آل انڈیا سنی بورڈ شہر کی مختلف مساجد میں عشرۂ رحمت کا انعقاد کرے گی۔ 1st to 10th of Rabi ul Awwal announced to Celebrate Ashra Rahmat
یہ بھی پڑھیں:
عشرۂ رحمت منانے کا بنیادی مقصد یہ ہے کہ پیغمبر اسلام کی سیرت سے لوگوں کو واقف کرانا اور اللہ کے رسول کے پیغام رحمت کو گھر گھر پہنچانے کی کوشش کی جائے۔ میٹنگ کو خطاب کرتے ہوئے مولانا خالد رشید فرنگی محلی نے کہا کہ 27 ستمبر کو چاند دیکھنے کا اہتمام کیا جائے گا۔ اس دن چاند ہونے کا امکان ہے۔ پہلی تاریخ 28 کو ورنہ 29 کو یکم ربیع الاول ہوگی اور میلاد النبی (12 ربیع الاول ) 9 اکتوبر یا 10 اکتوبر کو ہوگی۔
انہوں نے عوام سے اپیل کی ہے کہ 11 اور 12 ربیع الاول کی شب میں جشن رحمۃ للعالمین کے جلسوں کو منعقد کریں اور اس میں بڑی تعداد میں لوگ شریک ہوں۔ مولانا نے کہا کہ ہر برس کی طرح اس برس بھی 12 ربیع الاول کو نکلنے والے جلوس مدح صحابہ کا شاندار استقبال کیا جائے گا۔ اس سلسلے میں تیاریاں ابھی شروع کر دی گئی ہیں۔
آل انڈیا سنی بورڈ کے صدر مولانا مشتاق احمد نے بتایا کہ دس ربیع الاول تک شہر کی متعدد مساجد میں عشرۂ رحمت کا انعقاد کیا جائے گا جہاں پر سیرت رسول صلی اللہ علیہ وسلم اور ان کے پیغامات کو عوام تک پہنچانے کی کوشش کی جائے گی۔ اس میٹنگ میں مولانا سفیان نظامی، مولانا عبد اللطیف، مولانا ہارون نظامی، مفتی عتیق الرحمان، قاری تنویر عالم، قاری قمر الدین، حافظ محمد شمیم، حافظ محمد ارشاد، قمر الاسلام اور عدنان شامل رہے۔
