شمالی کشمیر کے ہندواڑہ کے تارتھ پورہ میں ایک رہائشی مکان میں جمعرات کو ایک پراسرار دھماکے کے نتیجہ میں ایک لڑکی ہلاک اور ایک ہی خاندان کے دیگر پانچ افراد زخمی ہوگئے۔
مقتولہ کی شناخت 17 سالہ شبنم بانو کے طور سے ہوئی ہے۔
ایک ہی خاندان کے دیگر پانچ زخمی ارکان کو فوری طور پر ڈسٹرکٹ ہسپتال ہندواڑہ پہنچایا گیا۔ دو زخمیوں کی حالت تشویشناک بتائی جاتی ہے۔ زخمیوں کی شناخت غلام محمد وانی، راجا بیگم، جنتی بیگم، رفعت اور مختی بیگم کے طور ہوئی ہے۔
ایک پولیس عہدیدار نے بتایا کہ ابتدائی تحقیقات سے پتہ چلتا ہے کہ دھماکہ سکریپ میٹریل میں ہوا۔ دھماکہ خیز مواد کے پھٹنے کی وجہ سے یہ دھماکہ ہوا۔
جموں و کشمیر پولیس نے ٹویٹ میں لکھا: 'تارتھ پورہ ہندواڑہ میں ایک افسوسناک واقعہ میں ایک شخص ہلاک اور 06 دیگر زخمی ہوئے۔ دھماکہ سکریپ میٹریل میں ہوا جس میں غیر دریافت شدہ شیل اور گرینیڈ شامل تھا جو شاید اس گھر میں موجود تھا۔ تفتیش جاری ہے۔'
