محکمۂ بجلی میں یومیہ اجرت پر کام کررہے عارضی ملازمین نے سرینگر میں محکمہ کے اعلیٰ افسران کے خلاف احتجاج کیا۔ احتجاج کررہے عارضی ملازمین نے محکمۂ بجلی کے اعلیٰ افسران پر غفلت شعاری کا الزام عائد کرتے ہوئے جموں و کشمیر انتظامیہ سے اس معاملے میں سخت نوٹس لینے کی گزارش کی۔
انہوں نے کہا کہ بجلی ترسیلی لائنوں اور ٹرانسفارمرز وغیرہ کی مرمت کے دوران متعدد ڈیلی ویجرز قیمتی جانوں سے ہاتھ دھو بیٹھے ہیں۔ احتجاج کررہے عارضی ملازمین نے دوران ڈیوٹی اس طرح کے حادثات کے لئے محکمۂ بجلی کے اعلیٰ افسران کو مورد الزام ٹھہرایا۔
انہوں نے حالیہ دنوں بجلی ترسیلی لائن کی مرمت کرتے ہوئے ہلاک ہونے والے ایک ڈیلی ویجر مشتاق احمد کی مثال دیتے ہوئے کہاـ: ’’اب تک سینکڑوں ڈیلی ویجرز بجلی لائنز کی مرمت کے دوران ہلاک ہوگئے، جب کہ متعدد عمر بھر کے لیے معذور ہوچکے ہیں۔‘‘
احتجاج کررہے عارضی ملازمین نے اس ضمن میں تفتیش کیے جانے کا مطالبہ کرتے ہوئے غفلت شعاری کا مظاہرہ کرنے والے محکمۂ بجلی کے اعلیٰ افسران کے خلاف کارروائی کیے جانے کا مطالبہ کیا۔
