سرینگر: لداخ یونین ٹریٹری کے ضلع کرگل خود مختار پہاڑی ترقیاتی کونسل کے انتخابات کے نتائج کا اعلان آج ہوگا اور اس کے لئے ووٹ کی گنتی کا آغاز ہوا ہے۔ سرکاری ذرائع کے مطابق ووٹ کی گنتی آج صبح آٹھ بجے شروع ہوئی اور دوپہر کے بعد تک جاری رہے گی۔ تاہم نتائج کا رجحان دوپہر سے قبل ہی معلوم ہونے کا امکان ہے۔ اس انتخاب میں الیکٹرانک ووٹنگ مشینوں کا استعمال کیا گیا ہے۔
ان انتخابات میں 26 سیٹوں کے لیے 85 امیدواروں نے حصہ لیا تھا۔ جن میں حکمران جماعت بی جے پی نے 17 سیٹوں پر امیدوار میدان میں اتارے تھے، جبکہ نیشنل کانفرنس نے 17 اور کانگریس کے 22 امیدوار یہ انتخابات لڑ رہے ہیں۔ وہیں عام آدمی پارٹی نے بھی پہلی مرتبہ ان انتخابات میں اپنی قسمت آزمائی کی ہے اور چار امیدواروں کو میدان میں ڈالا تھا۔ اس کے علاوہ 25 آزاد امیدوار بھی اپنی قسمت آزمائی کر رہے ہیں۔ کچھ سیٹوں پر نیشنل کانفرنس اور کانگریس کا دوستانہ مقابلہ تھا۔
کرگل ہل ڈیولپمنٹ کونسل کی تشکیل کے لئے 30 منتخب امیدوار ہوتے ہیں جن میں 26 کو عوام ووٹنگ سے منتخب کرتے ہیں جبکہ 4 امیدواروں کو ایل جی کی سفارش پر نامزد کیا جاتا ہے۔
مزید پڑھیں: لداخ انتظامیہ کی کرگل کے انتخابات میں بڑھ چڑھ کر حصہ لینے پر لوگوں کو مبارک باد
سیاسی تجزیہ کاروں کا ماننا ہے کہ یہ انتخابات حکمران جماعت بی جے پی کے سیاسی وقار کے لئے کافی اہم ہے۔ کیونکہ لداخ خطے کو جموں کشمیر ریاست سے علیحدہ کرکے یونین ٹریٹری کا درجہ دیا گیا ہے۔ بی جے پی کا دعوی ہے کہ انہوں نے اس خطے میں کافی تعمیر و ترقی کے منصوبے عمل میں لائے تاہم انتخابات کی مہم کے دوران کرگل میں لوگ حکومت سے کافی ناراض دکھ رہے تھے۔
