جموں و کشمیر یونین ٹیریٹری میں عالمی وبا کورونا وائرس کے مثبت معاملوں میں تیزی سے اضافے کے پیش نظر جموں وکشمیر ہائی کورٹ نے ہفتے کے روز خطے کی تمام عدالتوں میں آن لائن سماعت کے اپنے حکم نامے میں توسیع کرنے کا فیصلہ کیا ہے۔
حکم نامے میں کہا گیا ہے کہ ’’رواں مہینے کی پانچ تاریخ کو عدالت کی جانب سے جموں و کشمیر اور لداخ کی تمام عدالتوں میں سماعت آن لائن یعنی ورچوئل طریقے سے کیے جانے کے متعلق حکمنامے میں توسیع کی گئی ہے۔ اب رواں مہینے کی تیس تاریخ تک خطے کی کسی بھی عدالت میں آنے کی اجازت نہیں ہوگی۔‘‘
پانچ اپریل کو جاری کیے گئے حکم نامے میں عدالت نے کہا تھا کہ ’’پورے ملک اور خاص طور پر مرکزی زیر انتظام جموں و کشمیر میں عالمی وبا کورونا وائرس کے مثبت معاملات میں اچانک اضافے کے پیش نظر یہ فیصلہ لیا گیا ہے۔‘‘
قابل ذکر ہے کہ گذشتہ 24 گھنٹوں میں جموں و کشمیر میں کورونا کے 1144 مثبت معاملے سامنے آئے ہیں۔ ان معاملات میں 730 کشمیر صوبے سے ہے جبکہ دیگر 414 صوبہ جموں سے ہیں۔ اس کے علاوہ خطے میں عالمی وبا کے سبب دو افراد فوت ہو گئے۔
