ایس کے آئی سی سی (سرینگر) میں پارلیمنٹری آوٹریچ پروگرام فار پنچایتی راج انسٹیٹیوشنز کی تقریب کے دوران خطاب کرتے ہوئے ڈاکٹر فاروق عبداللہ نے جموں و کشمیر کے لفٹیننٹ گورنر سے مخاطب ہوکر کہا کہ ان کے افسران ہمارا فون نہیں اٹھاتے۔
ڈاکٹر فاروق عبداللہ نے کہا کہ ''لیفٹیننٹ گورنر صاحب اس کی طرف توجہ دیجیے گا۔ اپنے افسران کو کہیے کہ ٹیلی فون اٹھایا کریں۔ میں ایک ڈاکٹر ہونے کے ناطے سب کا فون اٹھاتا ہوں۔ میں ان سے ان کا مذہب اور ذات نہیں پوچھتا۔''
انہوں نے کہا کہ ''اگر میں فون نہیں اُٹھاؤں گا تو میں خدا کے سامنے کیا جواب دوں گا۔ لیکن ہمارے افسر ٹس سے مس نہیں ہوتے۔ انشاء اللہ وہ حکومت آنے والی ہے جب جواب دیا جائے گا۔''
یہ بھی پڑھیں : پنچایتی انتخابات میں حصہ نہ لینے پر افسوس ہے: فاروق عبداللہ
ڈاکٹر فاروق عبداللہ سرینگر میں ایس کے آئی سی سی میں منعقدہ پارلیمنٹ آوٹریچ فار پنچایتی راج انسٹیٹیوشنز کی تقریب سے خطاب کررہے تھے۔
انہوں نے مزید کہا کہ ’’بھارت ایک سیکولر اور مختلف مذاہب پر مشتمل و منحصر ملک ہے جس کا پارلیمانی ممبران اور اقتدار پر بیٹھے لوگوں کو خیال رکھنا چاہئے اور مذہب کے نام پر منافرت نہیں پھیلانی چاہئے۔‘‘
