مخصوص آٹو رکشا کے ذریعے 26 ریاستوں کی سیر

کیرالہ سے تعلق رکھنے والے سیاحوں کا کہنا ہے کہ ’’وادی کشمیر کے باشندے بے حد ملنسار اور مہمان نواز ہیں۔‘‘

ریاست کیرالہ سے تعلق رکھنے والے دو سیاح - ناؤف اور آسنا - ایک مخصوص آٹو رکشا کے ذریعے ہندوستان بھر کا سفر کر رہے ہیں۔

ملک کی 26 ریاستوں کا سفر کر نے کے بعد اس وقت وہ وادی چناب میں ہیں۔ لداخ اور وادی کشمیر سے واپسی کے بعد وہ چناب ویلی کے قدرتی نظاروں سے لطف اندوز ہو رہے ہیں۔

ای ٹی وی بھارت کے ساتھ بات کرتے ہوئے نائوف اور آسنا نے کہا کہ انہیں اس سفر سے کافی معلومات حاصل ہوئی ہیں۔ انہوں نے کہا کہ وہ مختلف ریاستوں کے لوگوں سے ملاقات کرکے بے حد خوش ہیں، تاہم انہوں نے کشمیر کے لوگوں کو سب سے زیادہ مہمان نواز قرار دیا۔

انہوں نے کہا کہ وادی کشمیر کے قدرتی نظاروں اور صحت افزا مقامات کی سیر ایک انوکھا تجربہ رہا۔ یہاں کے لوگ بھی بے حد ملنسار اور مہمان نواز ہیں۔

انہوں نے کشمیر کی شبیہہ کو خراب کرنے اور یہاں کے ماحول کو خراب بتانے والے افراد خصوصا میڈیا اداروں کی سخت مذمت کی۔ انہوں نے کہا کہ وہ کشمیر کے مختلف اضلاع میں قیام کر چکے ہیں اور انہیں اس طرح کے کسی بھی تجربہ سے نہیں گزرنا پڑا۔