ضلع پونچھ کے تحصیل آفس منڈی کے سامنے احتجاج کرتے ہوئے سرپنچ ایسوسی ایشن سے وابستہ سرپنچوں نے انتظامیہ پر ’’پنچایت نظام کو درہم برہم‘‘ کرنے کا الزام عائد کیا۔
احتجاج کے دوران سرپنچوں نے محکمۂ دیہی ترقی کے افسران کے خلاف ناراضگی کا اظہار کرتے ہوئے کہا کہ ’’افسر شاہی کے دور میں سرپنچوں کو اختیارات سے محروم رکھا جارہا ہے۔‘‘
انہوں نے الزام عائد کرتے ہوئے کہا: ’’سرپنچوں کو محکمہ دیہی ترقی کے افسران نے کاغذات کی نقل (فوٹو کاپی) جمع کروانے تک ہی محدود رکھا ہے جب کہ کاغذات جمع کرنے کے بعد فائلیں ردی کی ٹوکری میں پھینک دی جاتی ہیں۔‘‘
سرپنچوں نے کہا کہ گزشتہ برس ہر پنچایت میں مفلس اور لاچار کنبوں کے لیے پردھان منتری آواس یوجنا کے تحت مکان تعمیر کیے جانے کے سلسلے میں نشاندہی کروائی گئی اور سرپنچوں نے لسٹ مرتب کرکے متعلقہ دفتر میں جمع کیا تاہم افسران نے من مانی کرتے ہوئے از خود لسٹ میں نام اندراج کرکے سرپنچوں کی لسٹ کو بالائے طاق رکھ دیا۔
- مزید پڑھیں: پونچھ: ایک شخص کے پاس سے ہیروئن ضبط
تحصیلدار منڈی شہزاد لطیف خان اور بلاک ترقیاتی کونسل چیئرمین شمیم کے علاوہ بلاک ڈیولپمنٹ افسر نے احتجاج کر رہے سرپنچوں کو یقین دہانی کرائی کہ ان کے مسائل اعلیٰ حکام تک پہنچائے جائیں گے۔
