ریاست مدھیہ پردیش میں ضلع شہڈول کے جیت پور تھانے میں ایک 20 سالہ لڑکی کو بی جے پی رہنما سمیت چار افراد نے مبینہ طور پر اجتماعی زیادتی کا نشانہ بنایا۔ الزام ہے کہ لڑکی کو پہلے اغوا کیا گیا تھا اور پھر شراب پلاکر اجتماعی عصمت دری کی گئی۔
شہڈول ضلع بی جے پی کے صدر کمل پرتاپ سنگھ نے ایک پریس ریلیز جاری کرتے ہوئے کہا ہے کہ اجتماعی عصمت دری کے معاملے میں وجئے ترپاٹھی کا نام آنے کے بعد انہیں فوری طور پر جیت پور منڈل صدر سے بے دخل کر دیا گیا ہے اور پارٹی سے ان کی بنیادی رکنیت ختم کردی گئی ہے۔
متاثرہ کے ساتھ بد سلوکی کے معاملے میں بہت سارے بڑے نام سامنے آئے ہیں، جس میں بی جے پی جیت پور منڈل کے صدر وجے ترپاٹھی سمیت مننا سنگھ، راجیش شکلا، مونو مہاراج پر لڑکی نے اجتماعی عصمت دری کا الزام عائد کیا ہے۔ لڑکی کی شکایت کی بنیاد پر پولیس نے معاملے کی تفتیش شروع کردی ہے۔
ایڈیشنل ایس پی نے بتایا کہ ملزمان کے نام وجئے ترپاٹھی، مننا سنگھ، راجیش شکلا، مونو مہاراج ہیں، ان کے خلاف مقدمہ درج کیا گیا ہے، اب ہم اس سلسلے میں تفتیش کر رہے ہیں۔
ایڈیشنل ایس پی مکیش ویشیا نے بتایا کہ جیت پور میں ایک لڑکی نے رپورٹ درج کروائی ہے اور اس نے بتایا ہے کہ فارم ہاؤس میں چار افراد نے اس کے ساتھ بدتمیزی کی ہے۔ اس پر تھانہ جیت پور میں بھی جرم درج کیا جارہا ہے اور مقدمہ درج کرنے کے بعد پولیس تفتیش کر رہی ہے۔
جیسے ہی یہ معاملہ پارٹی کے دائرے میں آیا بی جے پی کے ضلع صدر کمل پرتاپ سنگھ نے تادیبی کارروائی کرتے ہوئے بی جے پی کے جیت پور ڈویژن کے صدر وجے ترپاٹھی کو فوری طور پر عہدے اور بنیادی رکنیت سے خارج کردیا۔
انہوں نے کہا کہ اس طرح کے گھناؤنے جرم میں ملوث افراد اور ایسے کارکنوں کے لئے بی جے پی میں کوئی جگہ نہیں ہے جو اس طرح کا سلوک کرتے ہیں۔ سنگھ نے کہا کہ بی جے پی اس طرح کے سلوک اور جرم کی شدید مذمت کرتی ہے۔ لہذا تادیبی کارروائی کرتے ہوئے وجے ترپاٹھی کو فوراً ہٹایا جاتا ہے اور پارٹی سے ان کی بنیادی رکنیت ختم کردی جاتی ہے۔
دراصل ضلع شہڈول کے جیت پور میں رہنے والی 20 سالہ لڑکی کو 18 فروری کو اس کے گھر کے سامنے سے اغوا کیا گیا تھا۔ اس وقت لڑکی سامان لانے بازار نکلی تھی، جس کے بعد یہ الزام لگایا جاتا ہے کہ منشیات کی خوراک دے کر ملزم نے متاثرہ بچی کو بے ہوش کردیا اور اس کے ساتھ اجتماعی عصمت دری کی۔ ہفتہ کے آخر میں ملزم بے ہوشی کی حالت میں متاثرہ بچی کو اس کے گھر کے سامنے چھوڑ گیا۔
