بنگلورو: کرناٹک اسمبلی انتخابات کے لیے پرچہ نامزدگی داخل کرنے کا آج آخری دن ہے۔ کانگریس نے آدھی رات کو اپنے امیدواروں کی چھٹی اور آخری لسٹ جاری کی۔ کانگریس نے آخری فہرست میں پانچ سیٹوں کے لیے ٹکٹوں کا اعلان کرتے ہوئے تمام 224 سیٹوں کے امیدواروں کا اعلان کر دیا ہے۔ کانگریس نے رائچور اسمبلی حلقہ سے محمد سالم، شدلا گھاٹ سے بی وی راجیو گوڑا، سی وی رمن نگر سے ایس آنند کمار، ارکلا گڈو اسمبلی حلقہ سے ایچ پی سریدھر گوڑا، منگلور نگر شمالی اسمبلی حلقہ سے عنایت علی کو ٹکٹ دینے کا اعلان کیا ہے۔
اس سے قبل بدھ کو پانچویں فہرست میں مزید چار امیدواروں کا اعلان کیا گیا تھا جن میں یاسر احمد خان پٹھان کا نام بھی شامل تھا، جنہیں شگ گاؤں اسمبلی حلقہ سے وزیر اعلیٰ بسواراج بومئی کے خلاف امیدوار بنایا گیا ہے۔ کانگریس نے اس سے قبل وزیر اعلیٰ کے خلاف محمد یوسف سوانور کو ٹکٹ دیا تھا۔ اب سوانور کی جگہ پٹھان کو میدان میں اتارا گیا ہے۔ کانگریس امیدواروں کی اس پانچویں فہرست میں پٹھان کے علاوہ تین اور نام بھی شامل ہیں۔ مولباگل سے بی سی مدوگنگادھر، کے آر پورہ سے ڈی کے موہن اور پلکیشی نگر سے اے سی سرینواس کو امیدوار بنایا گیا ہے۔
کانگریس تمام 224 اسمبلی سیٹوں کے لیے امیدواروں کے ناموں کا اعلان کر چکی ہے۔ کرناٹک میں 10 مئی کو ووٹنگ ہوگی اور ووٹوں کی گنتی 13 مئی کو ہوگی۔ کرناٹک اسمبلی انتخابات کے لیے پرچہ نامزدگی داخل کرنے کی آخری تاریخ 20 اپریل ہے۔ پولنگ 10 مئی کو ہوگی جب کہ ووٹوں کی گنتی 13 مئی کو ہوگی۔ جنتا دل سیکولر نے کرناٹک میں 10 مئی کو ہونے والے اسمبلی انتخابات کے لیے بدھ کو 59 امیدواروں کی تیسری فہرست بھی جاری کی۔
