بھارتی کرکٹ ٹیم کے سابق کھلاڑی سریش رینہ نے جموں میں کھلاڑیوں کے لئے ٹرائلز کا انعقاد کیا۔ سریش رینہ کرکٹ اکیڈمی نے 07 دسمبر کو سینئر ایج گروپ کے کھلاڑیوں کے لئے ٹرائلز منعقد کیے۔
07 دسمبر کو جموں میں میڈیا سے بات کرتے ہوئے رینہ نے جموں و کشمیر کے آل راؤنڈر کھلاڑی عبد الصمد کی کارکردگی اور انڈین پرائمیر لیگ (آئی پی ایل) کے 13 ویں سیزن میں ان کی پہلی کارکردگی پر بات کی۔
انہوں نے کہا 'عبد الصمد نے آئی پی ایل 13 میں واقعی بہت عمدہ کارکردگی کا مظاہرہ کیا ہے۔ انہوں نے سہولیات کی کمی کے باوجود بھی اپنی حوصلے اور خود اعتمادی کا مظاہرہ کر کے آئی پی ایل میں بہت کچھ کیا اور بہتر کھیل کا مظاہرہ کیا۔'
رینہ نے مزید کہا 'مجھے صمد پر اعتماد ہے اور اُس سے بات بھی کی ہے۔ بہت سارے کھلاڑی اسے کھیلتے ہوئے دیکھ کر آگے آئیں گے۔ اگر انہیں مناسب سہولیات میسر ہوں گی تو مستقبل میں وہ واقعتاً اچھا کھیلیں گے۔'
