Meri Maati Mera Desh Campaign پلوامہ میں شہیدوں کو خراج عقیدت پیش کی گئی

ضلع پلوامہ کے زڈورا علاقے میں بھی انتظامیہ کی جانب سے ایک تقریب کا انعقاد کیا گیا تھا جس میں شہید ہونے والے سیکیورٹی فورسز کے اہلکاروں کو خراج عقیدت پیش کیا گیا ۔ اس موقع پر ان کے لواحقین کی عزت افزائی کی گئی۔

پلوامہ: مرکز کے زیر انتظام یوٹی جموں و کشمیرمیں بھی میری مٹی میرا دیش مہم چلائی جا رہی ہے۔ اس سلسلے کے تحت جموں وکشمیر میں شہید ہونے والے سیکیورٹی فورسز کے اہلکاروں کو خراج عقیدت پیش کیا جارہا ہے۔ پلوامہ کے کلسٹر ماڈل اسکول میں شہیدوں کی یاد گار میں خصوصی پروگرام کا انعقاد کیا گیا۔

پروگرام کے آخر میں محکمہ سماجی بہبود کی جانب سے جسمانی طور کمزور افراد میں ٹرائی سائیکل تقسیم کئے گئے جس کا افتتاح ضلع ترقیاتی کمشنر پلوامہ ڈاکٹر بشارت قیوم نے کیا۔ اس موقع پر ان کے ہمراہ ایس ایس پی پلوامہ محمد یوسف کے علاوہ اے سی ڈی پلوامہ اور دیگر افسران موجود تھے۔

اس موقع پر ایس ایس پی پلوامہ نے خطاب کرتے ہوئے کہا کہ ملک کے سبھی لوگ ان شہیدوں کو خراج عقیدت پیش کرتے ہیں جنہوں نے اپنی جانوں کا نظرانہ ملک کی حفاظت میں پیش کیا۔ انہوں نے کہا کہ اس وقت سیکیورٹی فورسز عوام کی حفاظت کے لیے ہر طرح سے تیار ہے۔

اس موقع پر ڈی سی پلوامہ نے بھی خطاب کیا اور ملک کے ساتھ ساتھ ضلع کے ان نوجوانوں کو خراج عقیدت پیش کیا جنہوں نے ملک کی حفاظت میں اپنی جانوں کا نظرانہ پیش کیا۔ ضلع ترقیاتی کمشنر پلوامہ ڈاکٹر بشارت قیوم نے ای ٹی وی بھارت کے ساتھ بات کرتے ہوئے کہا کہ ملکی سطح پر شروع ہونے والے میری مٹی میرا دیش کمپین میں ضلع پلوامہ کے بڑھ چڑھ کر حصہ لیں گے۔ جس کے مقصد کہ ملک کے ویر کو خراج عقیدت پیش کرنا ہے۔