شوپیان ضلع کے پنجورہ میں ہلاک شدہ عسکریت پسند کے بھائی کی گرفتاری کے خلاف لوگ گھروں سے باہر نکل آئے اور نعرے بازی کی۔ مقامی افراد نے فورسز کی کاروائی پر سخت ردعمل کا اظہار کیا۔
تفصیلات کے مطابق فورسز نے منگل کی رات دیر گئے پنجورہ شوپیان میں عسکریت پسند عمر دھوبی (جو رواں برس 9 جون کو فورسز کے ہاتھوں اپنے تین ساتھیوں سمیت ایک انکاؤنٹر میں ہلاک ہوگیا) کے بھائی فیضان دھوبی کو اسکے گھر سے گرفتار کر کے اپنے ساتھ لے گئے۔
فورسز کی کاروائی کے بعد پنجورہ علاقے کے کچھ نوجوان اپنے گھروں سے باہر نکل آئے اور مساجد کے لاؤڈ سپیکروں کے ذریعہ لوگوں سے فیضان دھوبی کی گرفتاری کے خلاف احتجاج کرنے کی اپیل کی۔
بعدازاں مقامی لوگ سڑکوں پر نکل آئے اور فیضان دھوبی کی رہائی کا مطالبہ کیا اور سیکوریٹی فورسز کے خلاف نعرے بازی کی۔
آخری اطلاع موصول ہونے تک علاقہ میں مظاہرین کی جانب سے نعرے بازی جاری تھیں۔
