جموں وکشمیر پولیس نے اتوار کے روز جنوبی کشمیر کے ضلع شوپیان کے زین پورہ علاقے میں شدت پسند تنظیم لشکر طیبہ کے ایک خفیہ ٹھکانے کو تباہ کرنے کا دعوی کیا ہے۔
میڈیا کو ایک بیان میں پولیس نے کہا کہ داچھو زین پورہ کے باغات میں لشکر طیبہ کے عسکریت پسندوں کی موجودگی سے متعلق اطلاع ملنے پر شوپیان پولیس نے فوج کے 44 راشٹریہ رائفلز اور 178 بی این سی آر پی ایف کے ساتھ مشترکہ طور پر سرچ آپریشن شروع کیا۔ اس دوران لشکر طیبہ کے عسکریت پسندوں کی کمین گاہ کو تباہ کیا گیا ۔
یہ بھی پڑھیں
شوپیان: سی آر پی ایف پارٹی پر مشتبہ عسکریت پسندوں کا حملہ
انہوں نے کہا کہ ' خفیہ پناہ گاہ سے بھاری مقدار میں اسلحہ گولہ بارود جیسے دو یو بی جی ایل دستی بم، تین چینی دستی بم ، ایک اے 47 میگزین کے ساتھ ساتھ 20 اے کے 47 راؤنڈ، ایک ریڈیو سیٹ، کھانے پینے والی چیزیں اور دیگر دھماکہ خیز مادہ برآمد کیا گیا۔'
بیان میں مزید کہا گیا ہے کہ' دھماکہ خیز مادہ کو مزید تفتیش کے لئے پولیس تحویل میں لیا گیا ہے۔ اس سلسلے میں تھانہ زین پورہ میں مقدمہ درج کیا گیا۔'
واضح رہے کہ اتوار کے روز شوپیان میں مشتبہ عسکریت پسندوں نے ڈیوٹی پر مامور سی آر پی ایف کی ایک ناکہ پارٹی پر حملہ کیا تھا۔ تاہم اس حملے میں کوئی جانی نقصان نہیں ہوا تھا۔
