بھارتی وزیر اعظم نریندر مودی نے تین اکتوبر کو اسٹریٹیجک ہائی وے اٹل ٹنل کا افتتاح کیا ہے۔ ہمالیائی پہاڑی خطے میں تعمیرکردہ اٹل ٹنل اس متنازعہ علاقے تک جاتی ہے جو چین کے ساتھ سرحد سے جڑا ہوا ہے۔
اس سے قبل وزیر دفاع راج ناتھ سنگھ نے کہا تھا کہ اسٹریٹجک اعتبار سے اہم اٹل ٹنل بھارت کی سرحدوں کی حفاظت کرنے والے اور دور دراز علاقوں میں رہنے والے مسلح افواج کے لئے وقف ہے۔
سنگھ نے کہا کہ یہ سرنگ دو ممالک کے درمیان سرحدوں کی حفاظت کرنے والوں اور ان علاقوں میں رہنے والوں کے لئے وقف ہے، مجھے اس سرنگ کی اہمیت کی وضاحت کرنے کی ضرورت نہیں ہے ، اس کی اسٹریٹجک اہمیت کو ہر ایک سمجھتا ہے۔
انہوں نے مزید کہا کہ اس سرنگ کے سبب سرحد پر تعینات سیکورٹی فورسز کے لیے آسانی سے راشن، اسلحہ اور دیگر چیزیں پہچانے میں مدد ملے گی۔ اس سے قبل شدید برفباری کی وجہ سے وادی ہر سال تقریباً چھ ماہ تک منقطع رہتی تھی۔
