محکمۂ یوتھ سروسز اینڈ سپورٹس، ڈوڈہ کی جانب سے ضلع کے اسپورٹس اسٹیڈیم میں لڑکیوں کے لئے ’’ٹینس بال کرکٹ ٹورنمنٹ‘‘ کا افتتاح کیا گیا۔ زونل سطح پر منعقد ہونے والے اس ٹورنمنٹ کے حوالے سے ضلع اسپورٹس آفیسر نے بتایا کہ ضلع میں انڈر.14،17 اور انڈر 19 لڑکیوں کے لئے مختلف کھیل مقابلوں کا انعقاد کیا جا رہا ہے۔
انہوں نے کہا کہ پہلے مرحلے میں باسکٹ بال اور اب کرکٹ- جو دو روز تک جاری رہے گا- کا انعقاد عمل میں لایا جا رہا ہے، جس میں ضلع ڈوڈہ کے دس تعلیمی زونز سے وابستہ پچیس ٹیمیں شرکت کررہی ہیں۔
اُنہوں نے بتایا کہ پہلے اسکول لیول کے مقابلے منعقد کئے گئے تھے جہاں سے بعض ٹیمیں زونل سطح کھیل مقابلوں میں اپنی کارکردگی دکھا رہی ہیں۔ اس ٹورنمنٹ میں کامیابی حاصل کرنے والی ٹیمیں انٹر ڈسٹرکٹ مقابلوں میں ضلع کی نمائندگی کریں گی۔
لڑکیوں کے لئے ضلع میں پہلی بار کرکٹ ٹورنمنٹ کے انعقاد پر طالبات نے کہا کہ وہ اپنے زون کی نمائندگی کے لئے پُر جوش ہیں اور پوری محنت اور لگن کے ساتھ کھیل رہی ہیں۔
انہوں نے مزید کہا کہ لاک ڈاؤن کی وجہ سے تعلیم کے ساتھ ساتھ کھیل سرگرمیاں بھی متاثر ہوئیں تاہم کھیل کود کی سرگرمیوں کی بحالی سے طالبات ذہنی طور تندرست ہو رہی ہیں۔
ٹورنامنٹ میں شرکت کر رہی ضلع ڈوڈہ سے وابستہ طالبات نے ای ٹی وی بھارت کے ساتھ بات کرتے ہوئے کہا کہ انہیں اس طرح کے ٹورنامنٹس کے انعقاد سے کافی سپورٹ حاصل ہوگا۔ انہوں نے مستقبل میں بھی اس طرح کے ٹورنامنٹس کے انعقاد کی امید ظاہر کی۔
