دہلی پولیس کے خصوصی سیل نے پیر کو پاکستان میں قائم شدت پسند تنظیم جیش محمد سے تعلق رکھنے والے دو مشتبہ عسکریت پسندوں کو گرفتار کیا۔
دہلی پولیس کے مطابق اطلاع موصول ہونے پر پولیس نے کارروائی کرتے ہوئے دیر رات ملیینیم پارک سرائے کالے خان کے قریب ناکہ لگایا اور اس دوران دو مشتبہ عسکریت پسندوں کو گرفتار کیا گیا۔ گرفتار شدہ عسکریت پسندوں کی شناخت عبدالطیف (22) اور اشرف کھٹانہ (20) کے نام سے ہوئی ہے جو جموں و کشمیر میں بارہمولہ اور کپواڑہ کے رہائشی ہیں۔
پولیس نے ان کے قبضے سے دو پستول اور 10 زندہ کارتوس برآمد کیے ہیں ۔اطلاع ملنے پر قومی دارالحکومت کے سری کالے خان کے قریب 10 بجکر 15 منٹ پر ناکہ لگایا گیا تھا۔
اس سے قبل اگست میں دہلی پولیس کے خصوصی سیل نے قومی دارالحکومت میں ایک بڑے شدت پسندانہ حملے کو روکنے کے لئے فائرنگ کے ایک مختصر تبادلے کے بعد آئی ایس آئی ایس کے سرگرم کارکن یوسف خان کو گرفتار کیا تھا۔
