ڈی سی بڈگام شہباز احمد مرزا نے ضلع میں کورونا وائرس کی مجموعی صورتحال سے متعلق پریس بریفنگ کے دوران کہا کہ بڈگام میں عالمی وبا کورونا وائرس کے صرف 73 فعال معاملات ہیں، تاہم انہوں نے عوام سے رہنما خطوط پر سختی سے عمل کرنے کی تلقین کی۔
ڈی سی بڈگام نے کہا کہ ’’کورونا وائرس کے معاملات یقیناً کم ہورہے ہیں تاہم تیسری لہر کا خطرہ ابھی منڈلا رہا ہے۔‘‘ انہوں نے کہا کہ ’’اگر لوگ کورونا وائرس کی ممکنہ تیسری لہر کو روکنا چاہتے ہیں تو رہنما خطوط پر عمل ناگزیر ہے۔‘‘
انہوں نے لوگوں سے ماسک پہننے، سماجی فاصلہ برقرار رکھنے اور بھیڑ بھاڑ جمع کرنے سے پرہیز کرنے کی اپیل کی۔
ضلع بڈگام میں کورونا وائرس کی موجودہ صورت حال سے متعلق جانکاری دیتے ہوئے ڈی سی نے کہا کہ ضلع میں صرف 73 فعال معاملات ہیں، مثبت کیسز کی شرح 0.02 فیصد ہے جب کہ ریکووری ریٹ 99.8 فیصد ہے۔
مزید پڑھیں؛ دلتوں پرتشدد اور کسانوں پر ظلم حکومت کے زوال کا پیش خیمہ ثابت ہوگا: راہل گاندھی
شہباز مرزا نے کہا کہ ضلع بھر میں کورونا مخالف ٹیکہ کاری کا عمل جاری ہے۔ انہوں نے لوگوں سے از خود سامنے آکر کورونا مخالف ویکسین لینے کی اپیل کی۔
مرزا نے مزید کہا کہ ’’مجھے امید ہے کہ لوگ سمجھ داری سے کام لیں گے اور کورونا وائرس کو پھیلنے سے روکنے کے لیے وضع کی گئی گائڈ لائنز پر عمل کریں گے۔‘‘
