بگوں کے مین مارکیٹ میں دکانداروں نے ای ٹی وی بھارت کو بتایا کہ پچھلی ایک دہائی سے اس مارکیٹ کی سڑک خستہ ہے، جس کے باعث خرایدار اس مارکیٹ کا رُخ کرنے سے کتراتے ہیں۔
مقامی دکانداروں کا کہنا ہے کہ معمولی بارش کی وجہ سے پانی جمع ہو جاتا ہے اور کیچڑ کے سبب خریداروں کی دکانوں تک رسائی مشکل ہو جاتی ہے، جس سے انکا کاروبار متاثر ہو رہا ہے۔
انہوں نے متعلقہ محکموں اور انتظامیہ پر غفلت شعاری کا الزام عائد کرتے ہوئے کہا کہ ’’بار ہا ہم نے اعلیٰ حکام سے اپنی پریشانیوں کا ذکر کیا مگر وعدوں کے سوا کچھ نہیں ملا۔‘‘
اس ضمن میں جب ای ٹی وی بھارت کے نمائندے نے محکمہ آر اینڈ بی سوپور کے ایگزیکٹو انجینئر سے رابطہ کیا انہوں نے کہا کہ ’’فنڈس کی عدم دستیابی‘‘ کے سبب کام شروع نہیں ہو پایا۔
انہوں نے کہا کہ جوں ہی اس کام کے لئے رقم واگزار کی جاتی ہے فوری طور پر بگوں میں سڑک کی مرمت کا کام شروع کیا جائے گا۔
مقامی تاجروں کا کہنا ہے کہ ’’اگر دو دن کے اندر مسئلہ حل نہیں ہوا تو ہم احتجاج کرنے کیلئے مجبور ہو جائیں گے۔‘‘
