بارہمولہ: شمالی کشمیر کے ضلع بارہمولہ کے سوپور علاقے میں پولیس اور سیول انتظامیہ کی مشترکہ ٹیموں نے گزشتہ دنوں منشیات کی کاشت سے متعلق کی گئی کارروائی کے دوران کئی کنال اراضی پر کاشت کی جا رہی پوست کی فصل کو تباہ کر دیا۔ پوست کی کاشت کے خلاف کی گئی کارروائی میں سپور پولیس، محکمہ مال اور ایکسائز ڈیپارٹمنٹ کے اہلکار شامل تھے۔
تحصیلدار پنزی پورہ، سوپور، امن دیپ سنگھ نے پوست کی کاشت کے خلاف کی گئی کارروائی کے حوالہ سے تفصیلات فراہم کرتے ہوئے کہا کہ ’’تشکیل دی گئی ٹیم - جس میں پولیس، ریونیو اور ایکسائز محکمہ کے اہلکار شامل ہیں - نے سوپور کے مختلف علاقوں میں خشخاش کی فصل کے خلاف مہم تیز کر دی ہے اور سوپور کے پنزی پورہ کے مختلف علاقوں میں کئی کنال اراضی پر کی جا رہی پوست کی کاشت کو تباہ کر دیا۔‘‘ انہوں نے مزید کہا کہ فصل کو تباہ کرنے سے قبل ہی انہوں نے مقامی پی آر آئی ممبران، ذی عزت شہریوں اور مساجد کمیٹیز کے ذریعے از خود فصل کو تباہ کرنے کی درخوات کی تھی۔
امن دیپ سنگھ نے مزید کہا کہ کئی بار گزارشات کے باوجود لوگوں نے پوست کی کاشت جاری رکھی اور اس حوالہ سے کارروائی انجام دی گئی۔ انہوں نے کہا کہ پوست کی کاشت کو تباہ کرنے کے ساتھ ہی اس کی کاشت میں ملوث افراد کے خلاف قانونی کارروائی بھی انجام دی جائے گی۔ تحصیلدار نے مستقبل میں بھی اس طرح کی کارروائی جاری رکھنے کا عندیہ دیا۔ قابل ذکر ہے کہ منشیات کا قلع قمع کرنے کی غرض سے جموں و کشمیر انتظامیہ کے مختلف محکمہ جات کی جانب سے منشیات کے مضر اثرات سے متعلق آگاہی، سیمنارز اور ریلیز کے ساتھ ساتھ منشیات فروشوں کے خلاف کریک ڈاؤن بھی انجام دیا جا رہا ہے۔ وہیں اس ضمن میں خود روبھنگ اور پوست کی کاشت کو بھی تباہ کرنے کی مہم چلائی جا رہی ہے۔
مزید پڑھیں: Poppy Cultivation Destroyed اونتی پورہ میں پولیس کی جانب سے خشخاش کی فصل تباہ کرنے کی مہم جاری
