ایس ڈی آر ایف اور پولیس کی جانب سے چار دن تک جاری رہنے والے ریسکیو اور سرچ آپریشن کے بعد قصبہ اوڑی میں بونیار کے قریب دریائے جہلم میں ڈوبنے والے نابالغ لڑکے کی لاش بازیاب کی گئی۔
بدھ کی سہ پہر کو شمالی کشمیر کے ضلع بارہمولہ کے بونیار، اوڑی میں نہاتے ہوئے 12 سالہ شاہد احمد ولد مرحوم نور محمد دریائے جہلم میں ڈوب گیا تھا۔
مقامی نوجوان نے کمسن بچے کو بچانے کی بے حد کوشش کی تاہم وہ اس میں ناکام رہے۔ بعد ازاں پولیس کے موقع پر پہنچتے ہی سرچ آپریشن شروع کیا گیا۔
ایس ڈی پی او اوڑی نے بتایا کہ ’’ایس ڈی آر ایف اور پولیس کی ایک ٹیم نے بچے کو ڈھونڈنے کے لئے موٹر بوٹوں اور غوطہ خوروں کی مدد لی اور ہفتہ کو چار دن بعد بچے کی لاش ایچ پی سی ڈیم بونیار گیٹ کے قریب ملی۔‘‘
