ضلع بارہمولہ میں سرحدی قصبہ اوڑی کے مہورہ علاقے کے لوگوں کو پُل کی عدم دستیابی کی وجہ سے شدید پریشانیوں کا سامنا کرنا پڑ رہا ہے۔
پُل کی عدم دستیابی کے سبب عوام خصوصا اسکولی بچوں کو روز مرہ کی زندگی میں کافی دقتین پیش آتی ہیں۔
مہورہ کے دو دیہات کو جوڑنے کے لیے مقامی لوگوں نے لکڑی کا ایک عارضی پُل تعمیر کیا ہے۔ تاہم بارش کی وجہ سے نالہ میں طغیانی آنے کے سبب لکڑی کے عارضی پُل کو ہر بار نقصان پہنچتا ہے جس سے مہورہ علاقے کا زمینی رابطہ منقطع ہو جاتا ہے۔
مقامی باشندوں نے ای ٹی وی بھارت کو بتایا کہ پل کی تعمیر کا کام پانچ سال قبل شروع کیا گیا تھا جسے نامعلوم وجوہات کی بنا پر اچانک بند کر دیا گیا۔
انہوں نے کہا کہ پل نہ ہونے سے مقامی باشندوں کو مال مویشیوں کو ایک جگہ سے دوسری جگہ لے جانے میں بھی دقتیں پیش آتی ہیں۔
انہوں نے کہا کہ اس حوالے سے لوگوں نے انتظامیہ سے کئی بار پل کی تعمیر کا کام مکمل کرنے کی درخواستیں کی تاہم ’’لوگوں کے بینادی مسائل کو نظر انداز کیا جا رہا ہے۔‘‘
