ضلع بانڈی پورہ کے پانار علاقے میں لوگوں نے محکمۂ رورل ڈیولپمنٹ ڈیپارٹمنٹ کے خلاف احتجاج Protest Against Rural Development Department in Bandiporaکرتے ہوئے پُل کو جلد جلد مکمل کیے جانے کا مطالبہ کیا۔
مقامی باشندوں نے بتایا کہ علاقے میں برسوں قبل پل کی تعمیر کا کام شروع کیا گیا تاہم، انکے مطابق، تکمیل کے نزدیک پہنچتے ہی تعمیری کام نامعلوم وجوہات کی بنا پر روک دیا گیا۔ انہوں نے کہا: ’’عوامی مشکلات کو مد نظر رکھتے ہوئے انتظامیہ نے پانار میں پل کی تعمیر کے کام کو منظوری دے دی، پل کا اکثر حصہ تعمیر بھی کیا گیا تاہم اچانک کام کو روک دیا گیا۔‘‘
انہوں نے کہا کہ لوگوں کی جانب سے بار بار مطالبہ کیے جانے کے باوجود پل کا تعمیری کام مکمل نہیں کیا جا رہا ہے۔
مقامی باشندوں نے بتایا کہ پُل کی عدم موجودگی کے باعث مقامی باشندوں کو سخت مشکلات کا سامنا کرنا پڑتا ہے۔ انہوں نے کہا کہ ندی میں بارشوں اور برفباری کے سبب پانی کا بہاؤ تیز ہوتے ہی لوگ پیدل بھی نالہ پار نہیں کر پاتے، جس کے سبب لوگوں کو نالہ پار کرنے کے لیے کئی کلومیٹر کا سفر کرنا پڑتا ہے۔
انہوں نے مزید کہا کہ پُل نہ ہونے سے بچوں کا تعلیمی اداروں تک پہنچا بے حد مشکل ہو جاتا ہے وہیں ایمرجنسی کے دوران مریضوں کو اسپتال پہنچانے میں لوگوں کو سخت مشکلات سے جوجھنا پڑتا ہے۔
- مزید پڑھیں: بانڈی پورہ میں ٹھیکیداروں کا احتجاج
مقامی پی آر آئی ممبران نے میڈیا سے گفتگو کرتے ہوئے اسسٹنٹ کمشنر ڈیولپمنٹ ACD کو تنقید کا نشانہ بناتے ہوئے کہا: ’’کئی بار علاقے کے پنچ، سرپنچ اور بی ڈی سی ممبران نے ان سے اس مسئلہ کے بارے میں بات کی تاہم وہ ہر بار کوئی نہ کوئی بہانہ بنا کر ٹال دیتے ہیں۔‘‘
اس حوالے سے اے سی ڈی بانڈی پورہ نے فون پر بتایا کہ آئندہ دو یا تین ہفتوں کے دوران ٹینڈر اجرا کرکے جلد ہی پل کا تعمیری کام مکمل کر لیا جائے گا۔
