شمالی کشمیر North Kashmirکے ضلع بانڈی پورہ میں سرائے ڈانگرپورہ، سوناواری علاقے کے لوگوں نے محکمۂ بجلی کے خلاف احتجاجی مظاہرہ Protest Against PDD in Sonawari, Bandipora کیا۔ مظاہرے میں شامل لوگوں کا کہنا ہے کہ ان کے علاقے میں نصب بجلی ٹرانسفارمر بار بار خراب ہو رہا ہے جس کی وجہ سے وہ کئی ہفتوں سے بجلی سے محروم ہیں۔
انہوں نے حیرانگی کا اظہار کرتے ہوئے کہا: ’’گزشتہ کئی ہفتوں سے بجلی نظام بالکل ٹھپ ہے، اس کے باوجود محکمۂ بجلی نے ماہانہ فیس میں اضافہ کیا۔‘‘
سرائے ڈانگرپورہ، سوناواری کے باشندوں نے محکمۂ بجلی کو شدید تنقید کا نشانہ بناتے ہوئے کہا کہ ان کے علاقے میں 60 سے زائد کنبوں کے لیے محض 100 کلو واٹ ٹرانسفارمر نصب کیا گیا ہے جو آئے روز خراب ہو جاتا ہے۔ انہوں نے کہا: ’’بجلی ٹرانسفارمر آبادی اور لوڈ کے حساب سے نامناسب ہے اور بار بار خراب ہو جاتا ہے۔ محکمہ نے کئی دفعہ ٹھیک بھی کروایا مگر اس پر زیادہ لوڈ ہونے کی وجہ سے وہ جلد ہی خراب ہو جاتا ہے۔‘‘
انہوں نے مزید کہا کہ بجلی فیس میں بھی محکمہ نے اضافہ کیا ہے اور قریب ڈھائے سو روپئے کے اضافے کے ساتھ متعدد لوگوں کو بجلی بل روانہ کر دیے گئے ہیں۔
- مزید پڑھیں: پلوامہ میں محکمہ بجلی کے خلاف احتجاج
احتجاج کر رہے لوگوں نے بتایا کہ ایک جانب وہ پہلے سے ہی بجلی کی سہولیات سے محروم ہیں، دوسری جانب بجلی بلوں میں 250 روپئے کا اضافہ کیا گیا ہے جو ان کے مطابق صریح نا انصافی ہے۔
انہوں نے بجلی فیس میں کمی کیے جانے کے علاوہ 100 کلو واٹ ٹرانسفارمر کے بجائے 250 کے وی فراہم کیے جانے کی اپیل کی۔
