ضلع اننت ناگ کے تکیا ماگم کوکرناگ کے لوگوں نے شکایت کی ہے کہ گاؤں میں بجلی کا ترسیلی نظام خستہ حالی کا شکار ہو چکا ہے۔ لوگوں کا کہنا ہے کہ بجلی کی ترسیلی لائنیں بوسیدہ ہو چکی ہیں۔ جبکہ مقامی علاقہ میں بجلی کے کھمبوں کا فقدان ہے۔
مقامی لوگوں کا کہنا ہے کہ بجلی کا ترسیلی نظام اور کھمبے اتنے بوسیدہ ہو چکے ہیں، کہ کبھی بھی گرنے کا خطرہ ہے، جس کی وجہ سے کئی بار مقامی علاقہ میں بوسیدہ ہوئے ترسیلی نظام سے حادثات بھی رونما ہو چکے ہیں۔ ای ٹی وی بھارت سے بات کرتے ہوئے لوگوں نے کہا کہ 'موسم سرما کے ایام میں اُنہیں کئی کئی دنوں تک بجلی سے محروم رہنا پڈتا ہے۔ جس سے انہیں کافی مشکلات کا سامنا رہتا ہے'۔
یہ بھی پڑھیں:
لکڑی پر بجلی کے تار، لوگوں میں تشویش
اس مشکلات کو دور کرنے کے لئے اگرچہ مقامی لوگوں نے کئی بار محکمہ بجلی کی توجہ مرکوز کرنا چاہا تاہم ان کو محکمہ بجلی کے افسران نے ہمیشہ نظر انداز کیا۔
ای ٹی وی بھارت نے جب یہ معاملہ محکمہ بجلی کے ایگزیکیٹیو انجینیر فیاض احمد کی نوٹس میں لایا تو انہوں نے کہا کہ مذکورہ علاقہ کو باربڈ وائر اسکیم کے زمرے میں رکھا گیا ہے۔ جس کے تحت تکیا ماگم کو بجلی کے حوالے سے ہر ایک چیز فراہم کی جائے گی۔
