فوج نے سرینگر میں سُپر 30 پروگرام کے تحت جموں وکشمیر کے بارہویں جماعت کے تیس طلبہ کو کوچنگ فراہم کی۔ طلبہ کا کہنا ہے کہ فوج کے ذریعے اس پروگرام کے تحت ان کو پڑھائی، کونسلنگ، ہاسٹل و دیگر سہولیات مہیا کرائی گئیں جس کے سبب انہیں نیٹ امتحان پاس کرنے میں مدد ملی۔ یہ طلبہ آج جموں وکشمیر کے مختلف میڈیکل کالجز میں زیر تعلیم ہیں۔
ان طلبہ کے والدین بھی فوج کی جانب سے فراہم کرائے گئے مواقع سے بہت خوش ہیں جس کے سبب یہ طلبہ اس کامیابی سے ہمکنار ہوئے۔
ان طلبہ کو سرینگر میں کشمیر کے 15 ویں کور کے جی او سی لیفٹیننٹ جنرل ڈی پی پانڈے نے انعامات سے نوازا اور ان کی حوصلہ افزائی کی۔
ڈی پی پانڈے نے بتایا کہ جولائی 2018 میں فوج نے مقامی نوجوان کا مستقبل سنوارنے کے لیے سُپر 30 پروگرام شروع کیا گیا تھا۔
ان کا کہنا ہے کہ دو برسوں میں 68 طلبہ نیٹ امتحان میں کامیابی سے ہمکنار ہوئے ہیں اور مستبقل میں یہ اپنے وطن کے لوگوں کی خدمت کریں گے۔
مزید پڑھیں:ایس ایم سی نے سرینگر کے دو علاقوں کا نام تبدیل کیا
انہوں نے مزید کہا کہ سنہ 2018 میں فوج نے یہ پروگرام تجربے کے طور پر شروع کیا تھا اور کامیابی کے بعد اب اس سال 20 طالبات کو بھی یہ کوچنگ فراہم کی گئی۔
