چیمبر آف کامرس اینڈ انڈسٹری جموں کے صدر ارون گپتا نے ہفتے کو یہاں قریب دو درجن چھوٹی بڑی تجارتی انجمنوں کے نمائندوں کی موجودگی میں 'جموں بند' کی کال دی۔ ان کا کہنا ہے کہ شہر میں ریلائنس اسٹورز کے کھلنے سے 20 ہزار چھوٹے دکاندار بے روزگار ہوجائیں گے۔
انہوں نے ذرائع ابلاغ کے نمائندوں سے بات کرتے ہوئے کہا کہ 'ریلائنس اسٹورز کا کھلنا ہمارا سب سے بڑا مسئلہ ہے۔ ریلائنس اور مقامی حکومت کو سمجھ آنا چاہیے کہ ہم ایک ہزار لوگوں کو روزگار دے رہے ہیں اور بیس ہزار لوگوں کو بے روزگار کررہے ہیں۔'
انہوں نے کہا کہ 'ریلائنس اسٹورز میں کام کرنے والے تقریباً 70 فیصد لوگ باہر سے آئیں گے۔ چھوٹی چھوٹی دکانیں چلانے والے 20 ہزار لوگوں کا بے روزگار ہونا طے ہے۔
ان کا مزید کہنا ہے کہ ریلائنس کے پاس بہت سارے کام ہیں۔ وہ ان کی طرف دھیان دیں۔ جس طرح پنجاب سے ان کو بھگایا گیا اسی طرح یہاں سے بھی بھگایا جائے گا'۔
مزید پڑھیں:جموں: ریلائنس ریٹیل سٹور کھولنے کے خلاف چھوٹے بیوپاریوں کا احتجاج
ارون گپتا نے کہا کہ جموں و کشمیر میں عوامی منتخب حکومت کا نہ ہونا لوگوں کے لئے ایک بہت بڑا نقصان ہے۔
انہوں نے مزید بتایا کہ 'آپ عوامی منتخب حکومت سے اپنے مطالبات کسی بھی طرح منواسکتے ہیں۔ موجودہ افسر شاہی نظام میں تمام فیصلے اے سی والے کمروں میں بیٹھ کر کئے جاتے ہیں۔ پھر کہتے ہیں کہ ہمارے فیصلے غلط نہیں ہوسکتے'۔
