ریاست کرناٹک کے شہر گلبرگہ میں حیدرآباد کرناٹک سوشیل جاگرتی فورم تنظیم کی جانب سے التمش گیسٹ ہاؤس میں رسم اجراء پروگرام کا انعقاد کیا گیا۔
پروگرام میں مشہور شاعر ڈاکٹر وحید انجم پر لکھی گئی کتاب ’ڈاکٹر وحید انجم کی تخلیقی کائنات‘ کا رسم اجراء چیئرمن سرڈگی ڈگری کالج جناب ذوالفقار احمد سرڈگی کے بدست کیا گیا۔
کتاب کے مصنف ڈاکٹر الیاس خواجہ پوری کا تعلق بھی درس و تدریس سے جڑا ہوا ہے، وہ پری یونیورسٹی کالج سے منسلک ہیں اور وحید انجم کے دوستوں میں شمار ہوتے ہیں.
ڈاکٹر منظور احمد دکنی نے اپنے خطاب میں کہا کہ یہ کتاب ڈاکٹر وحید انجم کی شاعری، زندگی اور زمانے کی حقیقت کو بیان کرتی ہے، ڈاکٹر وحید انجم کی حیات اور ادبی کارناموں کا مطالعہ اس بات کی غمازی کرتا ہے کہ وہ ایک پیدائشی تخلیق کار ہیں، ان کا شعری مجموعہ سب رنگ ان کے تخلیقی سفر کے ارتقاء کی نمائندگی کرتا ہے۔
ڈاکٹر الیاس خواجہ پوری نے نہ صرف وحید انجم کی شخصیت اور حالات کو بیان کرنے کی کوشش کی ہے بلکہ ان کے افسانوں اور غیر افسانوی تحریروں کا جائزہ لینے کی بھی کوشش کی ہے.
