گلمرگ میں فوج نے 100 فٹ لمبا ترنگا نصب کیا

وادی کشمیر نہ صرف خوبصورت ہے بلکہ یہ قدرتی حسن سے مالا مال ہے جہاں گلمرگ علاقہ کو ایک الگ حیثیت حاصل ہے۔ گلمرگ، سیاحوں کا پسندیدہ مقام ہے جہاں قدرتی اور خوبصورت نظاروں کو دیکھنے اور ان سے لطف اندوز ہونے کےلیے دنیا بھر کے سیاح آتے ہیں۔

شمالی کشمیر کے بارہمولہ ضلع میں واقع خوبصورت سیاحتی مقام وادی گلمرگ میں آج بھارتی فوج نے 100 فٹ لمبا ترنگا لہرایا۔

75 ویں یوم آزادی کے موقع پر دفعہ 370 اور 35A کی منسوخی کے دو سال مکمل ہونے بعد پہلی مرتبہ گلمرگ میں ایک تقریب منعقد کی گئی جہاں فوج کی جانب سے 100 فٹ لمبا قومی ترنگا لہرایا گیا۔ اس موقع پر فوج کے عہدیداروں کے علاوہ سیول انتظامیہ کے افسران اور سماجی کارکنوں کی خاصی تعداد نے شرکت کی۔

تقریب کے دوران فوج نے متعدد سماجی کارکنوں کی حوصلہ افزائی کی جنہوں نے ملک کی سالمیت کو برقرار رکھنے میں اپنا کلیدی رول ادا کیا ہے۔ اس موقع پر فوج کے کمانڈر نے خطاب کرتے ہوئے کہا کہ جن کشمیریوں نے ملک کے لیے قربانیاں دی ہیں آج ہم انہیں یاد اور خراج پیش کرتے ہیں۔