سکیورٹی فورسز نے جوابی کارروائی میں ایک عسکریت پسند کو ہلاک کردیا ہے۔
العمر مجاہدین نامی عسکری تنظیم نے حملے کی ذمہ داری قبول کی ہے۔ تنظیم نے اس نوعیت کے مزید حملوں کی دھمکی دی ہے۔
انہوں نے بتایا کہ عسکریت پسندوں نے فورسز اہلکاروں پر اندھا دھند فائرنگ کی۔ فورسز نے بھی جوابی فائرنگ کی جس کے بعد طرفین کے مابین گولیوں کا شدید تبادلہ ہوا۔
سرکاری ذرائع نے بتایا کہ حملے میں پانچ سی آر پی ایف اہلکار، پولیس تھانہ صدر کے ایس ایچ او ارشاد احمد اور ایک خاتون سمیت سات افراد زخمی ہوئے۔
انہوں نے بتایا کہ زخمیوں کو فوری طور پر نزدیکی اسپتال منتقل کیا گیا جہاں تین سی آر پی ایف اہلکار زخموں کی تاب نہ لاتے ہوئے دم توڑ بیٹھے۔
ذرائع نے بتایا کہ سکیورٹی فورسز نے جوابی کاروائی میں ایک عسکریت پسند کو ہلاک کیا جس کی شناخت ہونا ابھی باقی ہے۔
انہوں نے بتایا کہ سبھی زخمیوں کو خصوصی علاج کے لیے سرینگر منتقل کیا گیا، تاہم راستے میں مزید دو زخمی سی آر پی ایف اہلکار دم توڑ بیٹھے۔
سکیورٹی ذرائع نے بتایا کہ علاقہ میں بڑے پیمانے پر تلاشی آپریشن شروع کیا گیا ہے۔ انہوں نے بتایا کہ بعض علاقوں کو محاصرے میں لیکر گھر گھر تلاشی لی جارہی ہے۔
