اترپردیش شیعہ وقف بورڈ کے سابق چیئرمین وسیم رضوی نے حال ہی میں پیغمبر اسلام حضرت محمد صل اللہ علیہ وسلم کی شان میں ایک بار پھر سنگین گستاخی کی ہے۔ اس گستاخی رسول کے معاملے کی آل انڈیا مجلس مشاورت گجرات کے جنرل سیکریٹری واصف حسین شیخ نے سخت لفظوں میں مذمت کی ہے۔
اس معاملے پر آل انڈیا مجلس مشاورت گجرات کے جنرل سیکریٹری واصف حسین شیخ نے کہا کہ وسیم رضوی کا نام زبان پر لینا ہی غلط ہے۔ اس نے جو نازیبا الفاظ ہمارے پیارے نبی کریم کے خلاف استعمال کیے ہیں وہ انتہائی قابل مذمت ہیں اور اس کے لیے اس کی جتنی مذمت کی جائے کم ہے، بلکہ انسانیت کا درد رکھنے والے تمام لوگ اس نازیبا حرکت کی مذمت کرتے ہیں اور میں بھی اسکی مذمت کرتا ہوں۔
مزید پڑھیں:۔ مرنے کے بعد مجھے دفنانے کے بجائے جلایا جائے: وسیم رضوی
انہوں نے مزید کہا کہ میں حکومت سے مطالبہ کرتا ہوں کہ حکومت وسیم رضوی اور نرسنگھانند سرسوتی جیسے لوگوں کو گرفتار کرکے ان پر جلد از جلد این ایس اے اور یو اے پی اے لگا کر جیل میں بند کریں کیونکہ یہ لوگ سماج اور قوم کے لیے خطرہ ہیں۔
انہوں نے کہا کہ جو لوگ بھی مذہبی شخصیات کی گستاخی کرتے ہیں ان کے خلاف ایک قانون بنایا جائے اور اس کے تحت انہیں سزا دی جائے۔
