گریٹر حیدرآباد میونسپل کارپوریشن (جی ایچ ایم سی)کے انتخابات سے پہلے جلد بازی میں یہ بیت الخلا مختلف مقامات پر فٹ پاتھس پر بنائے گئے تھے۔ تاکہ عوام ان کا استعمال کرسکیں تاہم حالیہ دنوں کے دوران ان کی نگہداشت کو بالکل نظرانداز کردیا گیا.
جس کے نتیجہ میں چھوٹا کاروبار کرنے والے افراد نے ان بیت الخلاؤں پر قبضہ کرتے ہوئے یہاں پر اپنے کاروبار کی شروعات کردی ہے۔
شہر کے عثمان ساگر رام دیوگ وڑہ، تارہ متی بارہ دری، نیک نام پور سے منی کونڈہ جانے والی سڑک پر لگائے گئے ان بیت الخلاؤں پر غیرمجاز قبضے کرتے ہوئے ان کو چھوٹی دکانات میں تبدیل کردیا گیا ہے۔
عوام نے ان بیت الخلاؤں کو پان شاپ اور چھوٹی کرانہ کی دکانات میں تبدیل کر دینے پر افسوس کا اظہار کرتے ہوئے بلدیہ کی لاپرواہی پر برہمی کا اظہار کیا ہے۔
عوام نے کہا کہ وزیر بلدی نظم ونسق تارک راما راؤ نے شہر کو صاف شہر میں تبدیل کرنے کے مقصد سے شہر کے کئی مقامات پر ایسے بیت الخلاء بنائے تھے جو اب قبضوں کی نذر ہوگئے ہیں۔
یو این آئی
