اننت ناگ: پورے ملک کے ساتھ ساتھ ضلع اننت ناگ کے مٹن میں بھی آج بیساکھی کا تہوار بڑے ہی جوش و خروش کے ساتھ منایا گیا۔ تقریب میں وادی کے سبھی اضلاع سے آئے ہوئے ہزاروں عقیدت مندوں نے شمولیت کی اور خصوصی پوجا پاٹ کی مجلس میں حصّہ لیا۔ اس موقع پر مٹن کے سکھ سنگت کی جانب سے لنگر کا بھی اہتمام کیا گیا، جبکہ انتظامیہ کی طرف سے محکمہ صحت، میونسپلٹی، بجلی، جل شکتی اور دیگر محکموں کے ملازمین کو عقیدت مندوں کی سہولیت کے لئے تعینات کیا گیا تھا۔ اس موقع پر سکیورٹی کے حوالے سے بھی غیر معمولی انتظامات کیے گئے تھے۔
تقریب میں مقامی مسلمانوں کے ساتھ ساتھ ہندوں نے بھی بڑھ چڑھ کر حصہ لیا اور سکھ کمیونٹی کو بیساکھی کے موقع پر مبارک باد پیش کی، جبکہ اس موقع پر مقامی مسلم نوجوان نے کہا کہ مٹن علاقہ صدیوں سے آپسی بھائی چارے کے لئے جانا اور پہچانا جاتا ہے، کیونکہ مٹن کی روایت رہی ہے کہ یہاں پر ہر کوئی تہوار آپسی بھائی چارے کے ساتھ منایا جاتا ہے، چاہے عید ہو، دیوالی ہو یا بیساکھی کا تہوار۔ علاقہ میں جہاں ایک طرف اذانوں کی گونج ہوتی ہے وہی دوسری طرف مندر سے گھنٹیوں کی آوازیں سنائی دیتی ہے، مقامی مسلمانوں نے اس موقع پر امن و امان کے ساتھ ساتھ سکھوں کو ڈھیر ساری مبارک باد پیش کی۔
تقریب سے خطاب کرتے ہوئے سکھوں کے مذہبی لیڈروں نے گرونانک اور گرو گوبند سنگھ کی تعلیمات پر عمل پیرا ہونے کی ضرورت پر زور دیا اور کہا کہ گرونانک اور گرو گوبند جی نے ہمیشہ آپسی بھائی چارے کا درس دیا ہے۔ انہوں نے کہا کہ بیساکھی کا تہوار بڑے ہی ملت کے ساتھ منایا جاتا ہے، جبکہ تقریباً 14 علاقوں سے تعلق رکھنے والے سکھوں نے آج مٹن صاحب گردوارے میں حاضری دی اور سربہ سجود ہوکر اپنے گناہوں کی معافی طلب کی، جبکہ وہ یہاں آ کر بہت خوش ہوئے ہیں۔
یہ بھی پڑھیں: Baisakhi Program in Tral: ترال میں بیساکھی کی اختتامی تقریب کا انعقاد
اس موقع پر مقامی سکھوں نے کہا کہ آج کے دن پر خصوصی لنگر کا اہتمام کیا جاتا ہے، جس میں چائے اور چاول کے ساتھ ساتھ مختلف قسم کی سبزیاں عقیدت مندوں میں تقسیم کی جاتی ہے، جس کو کھا کر عقیدت مند کافی خوش ہو جاتے ہیں جب کہ مسلم برادری نے حسب روایت ہمارا حوصلہ بڑھایا، آج بھی مٹن میں ہندو، مسلم، سکھ اتحاد کی جھلک دیکھنے کو ملی۔ پنجاب سے آئے ہوِئے عقیدت مندوں کے مطابق وہ آج مٹن صاحب گردوارے میں آکر خوش ہوئے کیونکہ آج اس تہوار کے موقع پر انہیں کسی طرح کا ڈر محسوس نہیں ہوا۔
