علی گڑھ :علی گڑھ مسلم یونیورسٹی (اے ایم یو) کے ریزیڈنشیئل کوچنگ اکاڈمی (آر سی اے) کے طلباء ضوفشاں حق (آل انڈیا رینک 34)، نازیہ پروین (آل انڈیا رینک 670) اور عبداللہ زاہد (آل انڈیا رینک 744) نے سول سروسز امتحان 2023 میں کامیابی حاصل کی ہے، جس کے نتائج کا اعلان یونین پبلک سروس کمیشن (یوپی ایس سی) نے منگل کو کیا۔
جامعہ ملیہ اسلامیہ نئی دہلی آر سی اے کوچنگ کے 70 طلباء میں سے 31 طلباء نے شاندار کامیابی حاصل کی ہے تو وہیں اے ایم یو, آر سی اے کے کل 8 طلباء میں سے صرف 3 طلباء نے کامیابی حاصل کی ہے ۔اس سے متعلق سوال کا جواب دیتے ہوئے اے ایم یو, آر سی اے کے ڈائریکٹر پروفیسر صغیر احمد انصاری نے بتایا گزشتہ سال کے مقابلے اس سال کے نتائج میرے لئے مایوس کن اس لئے بھی ہیں کیونکہ گزشتہ سال 6 کے مقابلے اس سال صرف 3 ہی طلباء نے کامیابی حاصل کی ہے ۔ اس سال میں کم سے کم 5 طلباء کے کامیابی کی امید کر رہا تھا۔
ہر سال اے ایم یو کے مقابلے جامعہ ملیہ اسلامیہ کے نتائج اچھے ہونے کی وجہ سے متعلق سوال کے جواب میں پروفیسر صغیر نے بتایا جامعہ ملیہ اسلامیہ کی آر سی اے کے ہاسٹل سہولیات کی گنجائش تقریبا 275 طلباء کی ہے اور ہمارے یہاں صرف 80 طلباء کی۔
انہوں نے مزید بتایا جامعہ ملیہ اسلامیہ کے مقابلے ہمارے یہاں نئے طلباء زیادہ آتے ہیں جو شروع کے دو تین سال میں اپنا ذہن بناپاتے ہیں اس کے بعد وہ دہلی چلے جاتے ہیں تیاری کرنے کے لئے کیونکہ وہاں پرائیوٹ کوچنگ بہت ہیں اس کے علاوہ جامعہ ملیہ اسلامیہ آر سی اے کے ڈائریکٹر بھی محنت کرتے ہیں اچھے نتائج کے لئے۔
واضح رہے ہر سال یو پی ایس سی امتحان کے نتائج اے ایم یو کے مقابلے جامعہ ملیہ اسلامیہ کے بہت اچھے ہوتے ہیں جس سے ظاہر ہوتا ہے کہ وہاں کی کوچنگ اور سہولیات بھی اچھی ہیں اسی لئے وہاں طلباء کی تعداد اور کامیابی حاصل کرنے والے طلباء کی تعداد اے ایم یو کے مقابلے زیادہ ہوتی ہے۔
یہ بھی پڑھیں:علی گڑھ: آلودگی پر قابو پانے کے لیے جلد اے ایم یو میں قایم ہوگا ریجنل سینٹر - Aligarh Muslim University
پروفیسر محمد گلریز قائم مقام وائس چانسلر، اے ایم یو نے کامیاب طلبہ کو ان کی محنت اور لگن کے لیے مبارکباد پیش کی اور محمد عمران رجسٹرار، اے ایم یو نے بھی طلباء کو ان کی اس کامیابی پر مبارکباد پیش کی جو عوامی خدمت کے میدان میں ایک شاندار کریئر کا آغاز ہے۔
