بنگلور: کرناٹک کے وزیر اعلیٰ سدارامیا نے آج میڈیا سے بات کرتے ہوئے کہا کہ اگر ایف ایس ایل کی رپورٹ سے یہ ثابت ہوتا ہے کہ پاکستان کے حق میں نعرہ لگایا گیا ہے تو اس سلسلے میں سخت کارروائی کی جائے گی۔ انہوں نے کہا کہ پاکستان کے حق میں نعرے لگانے والوں کو تحفظ دینے کا سوال ہی پیدا نہیں ہوتا۔
اس حوالے سے انہوں نے مزید کہا کہ جو بھی ملک کے خلاف نعرے لگائے گا اس کے خلاف سخت کارروائی کی جائے گی۔ میڈیا کے ایک سوال کے جواب میں کہ یہ واقعہ ودھان سبھا میں ہوا، اس پر انہوں نے کہا کہ جو لوگ نعرے لگانا چاہتے ہیں، وہ کہیں بھی لگائیں گے، اس سے کیا فرق پڑتا ہے کہ کہاں نعرے لگائے جارہے ہیں۔
غور طلب ہو کہ جب کانگریس کارکنان گزشتہ روز یہاں راجیہ سبھا انتخابات میں سید نصیر حسین کی جیت کا جشن منا رہے تھے، تب کچھ لوگوں نے 'ناصر صاحب زنداباد' کے نعرے لگائے، لیکن چند میڈیا چینلز نے اسے مبینہ طور پر 'پاکستان زندہ باد' کا نعرہ قرار دیا۔
یہ بھی پڑھیں؛
- کرناٹک وقف بورڈ کے لیے سو کروڑ کا بجٹ مسلمانوں کے لیے ایک سوغات
- حجاب مسئلہ پر سدرامیا حکومت کا امتحان
واضح رہے کہ اپوزیشن سیاسی پارٹی بی جے پی نے اس معاملے پر پولیس میں شکایت درج کرائی اور ریاست کے کئی حصوں بشمول بیلگاوی، چتردرگا اور منڈیا میں بدھ کو کانگریس حکومت کی مذمت کرتے ہوئے احتجاج بھی کیا۔ اس معاملے میں مرکزی وزیر پرہلاد جوشی نے کہا کہ میں ریاست کے وزیر داخلہ ڈاکٹر جی پرمیشور سے اپیل کرتا ہوں کہ وہ اس کو سنجیدگی سے نوٹس میں لیں، ورنہ بی جے پی ریاست گیر احتجاج کرے گی۔
