لوک سبھا انتخابات کو مدنظر رکھتے ہوئے تمام سیاسی جماعتیں اپنے اپنے امیدواروں کی فہرستیں جاری کر رہی ہیں۔ بی جے پی کے ساتھ اتحاد میں شامل ہونے والی راشٹریہ لوک دل نے بھی اپنے امیدواروں کے ناموں کا اعلان کیا ہے۔ بی جے پی کے ساتھ اتحاد میں آر ایل ڈی کو اتر پردیش میں دو لوک سبھا سیٹیں ملی تھیں۔ پارٹی نے دونوں سیٹوں کے لیے امیدواروں کا اعلان کر دیا ہے۔
جاری کردہ امیدواروں کی فہرست میں راشٹریہ لوک دل نے راج کمار سنگوان کو باغپت اور چندن چوہان کو بجنور سے ٹکٹ دیا ہے۔ اس کے علاوہ پارٹی نے قانون ساز کونسل کی ایک نشست کے لیے اپنے امیدوار کے نام کا بھی اعلان کیا ہے۔ بی جے پی نے اتحاد میں آر ایل ڈی کو قانون ساز کونسل کی ایک سیٹ بھی دی ہے۔ اس پر آر ایل ڈی نے یوگیش چودھری کو اپنا امیدوار بنایا ہے۔ اس کا اعلان پارٹی نے سوشل میڈیا پلیٹ فارم ایکس پر اپنے آفیشل ہینڈل پر کیا ہے۔
باغپت کو آر ایل ڈی کا گڑھ سمجھا جاتا ہے۔ باغپت ضلع میں 3 اسمبلی سیٹیں ہیں۔ سال 2012 میں بی ایس پی نے 2 اور آر ایل ڈی نے 1 سیٹ جیتی تھی۔ وہیں 2017 میں بی جے پی نے 2 اور آر ایل ڈی نے 1 سیٹ پر کامیابی حاصل کی تھی۔
آپ کو بتا دیں کہ میرٹھ کے ڈاکٹر راجکمار سنگوان 44 سال سے آر ایل ڈی سے وابستہ ہیں۔ طالب علم اور کسانوں کی سیاست میں طویل عرصے سے جڑے ڈاکٹر راجکمار سنگوان نے شادی بھی نہیں کی اور نچلی سطح کی سیاست کرتے رہے ہیں۔ اس وقت وہ آر ایل ڈی کے قومی سکریٹری ہیں۔ ڈاکٹر راجکمار سنگوان (63) کو پہلی بار 1980 میں باغپت کے مایا تیاگی واقعہ میں تحریک کے دوران جیل بھیج دیا گیا تھا۔ اس کے علاوہ وہ طلبہ اور کسان تحریکوں میں درجنوں بار جیل گئے۔ انہوں نے میرٹھ کالج سے ایم اے ہسٹری کیا ہے۔ اس کے بعد انہوں نے چودھری چرن سنگھ پر پی ایچ ڈی کی۔ وہ میرٹھ کالج میں تاریخ کے پروفیسر بھی رہ چکے ہیں۔
