کولکاتا: مغربی بنگال کے کولکاتا کے آر جی میڈیکل کالج میں ایک خاتون ٹرینی ڈاکٹر کے ریپ اور قتل کا معاملہ زور پکڑتا جا رہا ہے۔ اس واقعہ کے خلاف احتجاج میں ریزیڈنٹ ڈاکٹروں کی تنظیم 'فیڈریشن آف آل انڈیا ریذیڈنٹ ڈاکٹرز ایسوسی ایشن' نے آج سے پورے ملک میں ہڑتال کا اعلان کیا ہے۔ یہی نہیں، ایسوسی ایشن نے تمام سرکاری اسپتالوں کے ریزیڈنٹ ڈاکٹروں سے بھی ہڑتال میں شامل ہونے کی اپیل کی ہے۔
اس دوران ایسوسی ایشن نے او پی ڈی، انتخابی سرجری اور لیب کا کام بند رکھنے کی اپیل کی ہے۔ ادھر آر ڈی اے نے بھی ڈاکٹروں کو ہڑتال پر جانے کا نوٹس دے دیا ہے۔ آپ کو بتاتے چلیں کہ آر جی کار میڈیکل کالج کے جونیئر ڈاکٹر بھی متاثرہ کے لیے انصاف کا مطالبہ کرتے ہوئے مسلسل احتجاج کر رہے ہیں۔
#WATCH | RG Kar Medical College & Hospital incident | Delhi: Doctors and medical students gathered to protest over the Kolkata medical student death incident.
— ANI (@ANI) August 12, 2024
The members of FORDA call for a nationwide strike and demand justice for the tragic death of a second-year PG resident… pic.twitter.com/b1LlXuV26t
غور طلب ہے کہ پولیس نے اس معاملے میں ایک شخص کو گرفتار بھی کیا ہے۔ گرفتار شخص کا نام سنجے رائے بتایا جاتا ہے۔ تاہم ڈاکٹروں کا کہنا ہے کہ اس جرم میں کئی اور لوگ بھی ملوث ہو سکتے ہیں جب کہ پولیس نے صرف ایک شخص کو گرفتار کیا ہے۔
ڈاکٹروں کا دعویٰ ہے کہ سنجے رائے کو گرفتار کرکے کچھ بڑا چھپانے کی کوشش کی جارہی ہے۔ انہوں نے الزام لگایا کہ انہیں ابھی تک جائے وقوع کے ارد گرد سی سی ٹی وی فوٹیج دیکھنے کی اجازت نہیں دی گئی ہے۔ اس سے پہلے اس معاملے میں محکمہ صحت نے میڈیکل کالج کے سپرنٹنڈنٹ ڈاکٹر سنجے وششٹھا کو ہٹانے کا حکم دیا تھا۔
واضح رہے کہ جمعہ کو جب سے لیڈی ڈاکٹر کی لاش برآمد ہوئی تھی، تب سے سپرنٹنڈنٹ کو ہٹانے کا مطالبہ کیا جا رہا تھا اور اب محکمہ صحت نے انہیں ہٹانے کا حکم جاری کر دیا ہے۔
دوسری جانب مغربی بنگال کی وزیر اعلیٰ ممتا بنرجی نے ملزمان کو سزائے موت دینے کا مطالبہ کیا۔ انہوں نے کہا کہ اگر متاثرہ خاندان سی بی آئی انکوائری کا مطالبہ کرتا ہے تو وہ اس کی حمایت کریں گے۔ انہیں اس پر کوئی اعتراض نہیں ہے۔ ساتھ ہی گورنر سی وی آنند بوس نے بھی ممتا حکومت سے اس معاملے میں فوری کارروائی کرکے رپورٹ پیش کرنے کو کہا ہے۔
یہ بھی پڑھیں:بہار میں المناک حادثہ، مندر میں بھگدڑ مچنے سے پانچ خواتین سمیت سات عقیدت مندوں کی موت
انڈین میڈیکل ایسوسی ایشن (آئی ایم اے) نے بھی اس معاملے پر اپنا ردعمل دیا ہے۔ آئی ایم نے پولیس کو کیس کی تحقیقات مکمل کرنے کے لیے 48 گھنٹے کا الٹی میٹم دیا ہے۔ ایسا نہ ہونے کی صورت میں ملک گیر احتجاج کا انتباہ بھی دیا ہے۔
