حیدرآباد: شہر حیدرآباد کے شہری حالیہ دنوں میں شدید مہنگائی کی زد میں ہیں، خصوصاً ترکاری کی قیمتوں میں غیر معمولی اضافہ نے عوام کو پریشانی میں مبتلا کر دیا ہے۔ خاص طور پر ٹماٹر، جو کہ ہر گھر کی روزمرہ استعمال ہونے والی بنیادی ضرورت ہے، اس کی قیمتیں آسمان کو چھونے لگی ہیں۔ تازہ اطلاعات کے مطابق، ٹماٹر کی قیمت 150 روپے سے 200 روپے فی کلو تک پہنچ چکی ہے، جو متوسط طبقے اور غریب عوام کے لیے ایک بڑا مسئلہ بن چکی ہے۔
شہر کے مختلف بازاروں میں سبزی فروشوں کا کہنا ہے کہ ٹماٹروں کی قیمت میں اضافہ کی وجہ موجودہ موسمی حالات ہیں۔ حالیہ بارشوں اور طوفانوں نے فصلوں کو نقصان پہنچایا ہے، جس کی وجہ سے ٹماٹر کی پیداوار میں واضح کمی آئی ہے۔ کسانوں کے مطابق زیادہ بارشوں اور سیلاب کی وجہ سے فصلوں کا بڑا حصہ خراب ہو گیا ہے، جس کے نتیجے میں مارکیٹ میں ٹماٹروں کی فراہمی متاثر ہوئی ہے۔
ایک سبزی فروش جوہر علی نے کہا کہ "ہمیں خود مہنگے داموں ٹماٹر مل رہے ہیں، اس لیے ہم بھی مجبور ہیں کہ قیمتیں بڑھائیں۔ عام حالات میں ایک دن میں جو ٹماٹر کی مقدار آتی تھی، اب اس کا نصف بھی مشکل سے دستیاب ہو رہا ہے۔"یہ صرف ٹماٹر تک محدود نہیں ہے۔ پیاز، آلو، اور دیگر سبزیاں بھی قیمتوں میں اضافے کا شکار ہیں۔ پیاز کی قیمت بھی 80 سے 100 روپے فی کلو تک پہنچ چکی ہے، جبکہ آلو 50 سے 60 روپے فی کلو فروخت ہو رہا ہے۔
حیدرآباد کے باشندے بالخصوص گھریلو خواتین سخت پریشان ہیں۔ ایک خاتون سائرہ بیگم نے شکایت کی کہ "ہمارے لیے روزمرہ کا کھانا بنانا مشکل ہو گیا ہے۔ ہر دن قیمتیں بڑھ رہی ہیں، اور یہ سمجھ نہیں آ رہا کہ آخر کب تک یہ سلسلہ جاری رہے گا۔
دوسری جانب حکومتی ذرائع کا کہنا ہے کہ وہ اس صورتحال سے آگاہ ہیں اور ترکاریوں کی فراہمی کو بہتر بنانے کے لیے اقدامات کر رہے ہیں۔ وزارت زراعت کے ایک ترجمان نے بتایا کہ "ہم کسانوں کی مدد کر رہے ہیں تاکہ وہ اپنی فصلیں بحال کر سکیں۔ ساتھ ہی ذخیرہ اندوزی اور بلیک مارکیٹنگ کے خلاف سخت کارروائی بھی کی جا رہی ہے۔ حیدرآباد کے عوام حکومت سے امید کر رہے ہیں کہ جلد از جلد اس سنگین مسئلے کا حل نکالا جائے تاکہ انہیں روزمرہ کی ضروریات کی خریداری میں آسانی ہو۔
