کلکتہ: بہار کے وزیر اعلیٰ نتیش کمار کے ایک بار پھر عظیم اتحاد سے الگ ہوکر بی جے پی کے ساتھ ہاتھ ملانے کی خبروں کے درمیان وزیر اعلیٰ ممتا بنرجی نے کہا کہ اگر نتیش کمار انڈیا اتحاد چھوڑ کر جاتے ہیں تو اس سے انڈیا اتحاد کو نقصان نہیں ہوگا۔ راج بھون میں یوم جمہوریہ کے موقع پر منعقد تقریب میں شرکت کے بعد نامہ نگاروں کے سوالوں کا جواب دیتے ہوئے ممتا بنرجی نے کہا کہ اگر نتیش کمار چلے جاتے ہیں تو یہ انڈیا اتحاد کے لئے اچھا ہوگا۔بہار کے عوام اس تبدیلی کو پسند نہیں کریں گے۔
اس سے قبل ممتا بنرجی نے واضح کیا تھا کہ بنگال میں ترنمول کانگریس سیٹوں کی تقسیم نہیں کرے گی۔تنہا انتخاب لڑے گی اور انتخابات کے بعد اتحاد میں شامل رہیں گی ۔ممتا بنرجی کے اس اعلان کے اگلے دن ہی جمعرات کو بہار کی سیاست میں ہلچل تیز ہوگئی ہے-گرچہ اس معاملے میں اپوزیشن لیڈران کچھ بھی کہنے سے گریز کررہی ہیں مگر سب سے پہلے اس معاملے میں ممتا بنرجی نے اپنا موقف پیش کیا ہے اور نتیش کمار کی اس تبدیلی کو اہمیت دینے سے گریز کیا ہے۔
واضح رہے کہ نتیش کمار نے ہی سب سے پہلے بی جے پی کے خلاف ملک کی مختلف علاقائی جماعتوں کو متحد کرنے کے لئے پہل کی تھی۔ نتیش نے ملک کی مختلف ریاستوں میں حزب اختلاف کی سیاسی جماعتوں کے رہنماؤں سے ملاقات کی۔ وہ بنگال آئے اور انہوں نے ترنمول کے رہنما اور وزیر اعلی ممتا بنرجی سے ملاقات کی۔ ان کی کوششوں میں ، حزب اختلاف کا پہلا اجلاس گذشتہ سال جون میں بہار کے پٹنہ میں ہوا تھا۔ ترنمول کانگریس نے بھی اس میٹنگ میں شرکت کی تھی ۔اس میٹنگ کے 6ماہ بعد نتیش کمار کے اتحاد سے الگ ہونے کی خبریں گردش کررہی ہیں ۔
یو این آئی
