اجین: تعلیم کے ذریعہ انسان میں شعور پیدا ہوتا ہے۔ دنیاوی تعلیم جہاں انسان کو پاک اور شفاف زندگی گزر بسر کرنے میں مدد کرتی ہے تو وہیں دینی تعلیم ایمان میں پختگی لاتی ہے۔ بلکہ مذہب کو لے کر جو لوگ غلط فہمیوں کا شکار ھوتے ہیں ان کی غلط فہمی کو دور کرتی ہے۔ اسی سنجیدہ موضوع کو لے کر ریاست مدھیہ پردیش کے تاریخی شہر اجین کی سماجی تنظیم صراط النبی کمیٹی گزشتہ کئی سالوں سے شہر اور اطراف کے اضلاع کے بچوں کے درمیان اسلامی مقابلہ جات منعقد کرتی ہے۔ جس میں ہزاروں بچے ہر سال حصہ لے کر اپنے علم میں اضافہ کرتے ہیں۔
ریاست مدھیہ پردیش کے تاریخی شہر اجین کی سماجی تنظیم صراط النبی کمیٹی کئی سالوں سے اسلامی کوئز مقابلہ منعقد کر رہی ہے۔ اس بار بھی یہ مقابلہ عمل میں آیا۔ جس میں کامیاب بچوں کو عظیم الشان جلسے میں سیاسی، سماجی، ملی اور مذہبی شخصیات کے ہاتھوں انعام و اکرام سے نوازا گیا۔ فاتح امیدواروں کے لیے ہر سال تنظیم عظیم الشان جلسے کا اہتمام کرتی ہے، جس میں صوبے کی سیاسی، سماجی، ملی اور مذہبی شخصیات کے ہاتھوں کامیاب طلبہ کو ہزاروں روپے کے انعامات اور اکرام سے نوازا گیا۔
مقابلہ جیتنے والے بچوں کو ایسے تحفے دیے جاتے ہیں جو تعلیم حاصل کرنے اور زندگی گزارنے کے لیے ضروری ہوتے ہیں۔ مثلاً پڑھائی کے لیے کمپیوٹر تو اسکول اور کوچنگ جانے آنے کے لیے سائیکل۔ تو وہیں کتابیں رکھنے کے لیے الماری جیسی ضرورت کی چیزیں دی جاتی ہیں۔ جنہیں حاصل کرکے بچے بڑے خوش ہوتے ہیں۔
شہر قاضی خلیق الرحمٰن نے کہا کہ تعلیم کو فروغ دینا ضروری ہے تاکہ بچے مضبوط معاشرے کی بنیاد ڈال سکیں۔ ساتھ ہی یہ بچے اسلامی تعلیمات کے متعلق اور لوگوں کی غلط فہمیاں دور کریں گے۔ جو اسلامی تعلیمات کو لے کر غلط فہمیوں کا شکار ہیں۔ وہیں سے سیرت النبی کمیٹی کے صدر حاجی فہیم سکندر نے بتایا کہ ہماری کوشش ہے کہ کوئز کے ایسے مقابلوں کے ذریعے بچوں میں دینی اور ادبی صلاحیتوں کی دلچسپی پیدا کرنا ہے۔
کاروباری سمیع الحق کا کہنا تھا کہ جب ہم چھوٹے بچے تھے ایسی تقریب میں حصہ لے کر بڑی خوشی ملتی تھی لیکن اب صراط النبی کمیٹی سے جڑ کر تعاون کرنے میں بڑی خوشی حاصل ہوتی ہے۔ انسانی زندگی میں تعلیم کی بڑی اہمیت ہے۔ وہ چاہے دینی ہو یا عصری تعلیم ہو کیونکہ جب انسان کی زندگی میں اچھے اور برے کا وجود کھڑا ہو جاتا ہے تو وہ پھر کسی شیطان کے بہکانے میں نہیں آتا اور صراط مستقیم پر چلتے ہوئے زندگی کو کامیاب کر سکتا ہے۔
