مظفر نگر: ریاست اتر پردیش کے ضلع مظفر نگر کے کلیکٹریٹ کے احاطے میں موب لنچنگ اور بلڈوزر کی کاروائی کے خلاف آل انڈیا مجلس اتحاد المسلمین کے سینکڑوں سے زائد کارکنان اور عہدے داران نے مظفر نگر ضلع صدر عمران قاسمی کی سربراہی میں زبردست احتجاجی مظاہرہ کیا اور ایک میمورنڈم ملک کے صدر کے نام ضلع انتظامیہ کو پیش کیا۔
ای ٹی وی بھارت اردو کے ساتھ خاص بات چیت میں مظفر نگر آل انڈیا مجلس اتحاد المسلمین کے ضلع صدر عمران قاسمی نے مزید معلومات دیتے ہوئے بتایا کہ آج 17 جولائی کو ریاست کی سبھی ضلع کلیکٹریٹ پر مجلس اتحاد المسلمین نے موب لنچنگ، بلڈوزر سمیت مختلف مطالبات کو لے کر ایک روزہ احتجاجی مظاہرے کا اعلان کیا تھا۔ اس کے مطابق آج مظفر ضلع کلیکٹریٹ پر سینکڑوں کی تعداد میں ایم آئی ایم کے کارکنان اور عہد یداران نے اپنے انہیں مطالبات کو لے کر احتجاجی مظاہرہ کیا۔ انہوں نے کہا کہ پوری ریاست میں اس وقت دہشت کا ماحول ہے جسے ختم کیا جانا چاہیے۔ مذہب اور ذات پات کے نام پر معاشرے میں نفرت پھیلانے والوں کے خلاف سخت ترین کاروائی کی جائے۔
ان کا مزید کہنا تھا کہ ماب لنچنگ جیسی وارداتوں کو روکنے کے لیے مناسب قدم اٹھائے جائیں۔ انہوں نے کہا کہ جب تک ہمارے مطالبات کو تسلیم نہیں کیا جاتا ہم اسی طرح سے احتجاجی مظاہرہ کرتے رہیں گے۔
