علی گڑھ: علی گڑھ مسلم یونیورسٹی (اے ایم یو) کے شعبہ جغرافیہ اور اے ایم یو برادری کے لیے ایک قابل فخر لمحہ ہے، کہ انٹرنیشنل جیوگرافی کانگریس XVIII ڈی جی ایس آئی کے موقعے پر رسرچ اسکالر منال احمد کو دکن جیوگرافیکل سوسائٹی آف انڈیا نے "ینگ جیوگرافر ایوارڈ، 2024" سے نوازا ہے۔
منال احمد نے ای ٹی وی بھارت سے خصوصی گفتگو میں بتایا کہ انٹرنیشنل جیوگرافی کانگریس XVIII ڈی جی ایس آئی کا اہتمام محکمہ جغرافیہ عثمانیہ یونیورسٹی، حیدرآباد نے سات مارچ 2024 کو کیا تھا۔ "ینگ جیوگرافر سیشن" میں شاندار کارکردگی پر مجھے ینگ جیوگرافر ایوارڈ سے نوازا گیا جس میں شال، سرٹیفکیٹ، یادگاری مومنٹو اور 7000 روپے کے نقد انعام سے نوازا گیا ہے۔
منال نے مزید بتایا کہ یہ ایوارڈ مجھے نہیں یونیورسٹی کو ملا ہے، شعبہ اور یونیورسٹی میں اس کو لیکر خوشی ہے اور میں مستقبل میں اسی طرح یونیورسٹی اور ملک کا نام روشن کرتی رہوں گی۔ غور طلب ہو کہ منال کا ایک شاندار تعلیمی ریکارڈ ہے۔ انہوں نے یو جی سی جے آر ایف کوالیفائی کیا ہے۔ اس وقت "شمالی بہار میں آبی زمین کی حرکیات ایک ماحولیاتی اور سماجی اقتصادی نقطہ نظر پر کام کر رہی ہے اور ان کی اسکوپس انڈیکسڈ جرنلز میں بین الاقوامی اشاعتیں ہیں۔
یہ بھی پڑھیں:
- اے ایم یو ریزیڈنٹ ڈاکٹروں اور پروفیسر کو ایوارڈ سے نوازا گیا
- اے ایم یو میں ہم جنس پرستی پر توسیعی لیکچر
انہوں نے اپنے سپروائزر پروفیسر سید نوشاد احمد کی اپنے تعلیمی سفر کے دوران ان کی غیر متزلزل حمایت اور انمول رہنمائی کے لیے شکریہ ادا کیا۔ اس موقعے پر منال کے سوپروائزر پروفیسر سید نوشاد احمد نے خوشی کا اظہار کیا، انہوں نے بتایا کہ منال شعبہ کی ایک قابل اور ایکٹو طالب علم ہے۔ منال کی اس کامیابی پر شعبہ جغرافیہ سمیت یونیورسٹی میں خوشی ہے۔ امید ظاہر کرتے ہوئے انہوں نے مزید کہا کہ مستقبل میں منال اسی طرح یونیورسٹی اور ملک کا نام روشن کریں گی۔
