مالیگاؤں: مہاراشٹر کے مسلم اکثریتی شہر مالیگاؤں میں دن بہ دن بڑھ رہے جرائم کو لے کر شہر بھر میں چرچا کا ماحول پیدا ہوگیا ہے۔ ایسے میں 15 اپریل 2024 کی شب 10 بجے کے درمیان سنگمیشور سانڈوا پل کے سامنے مولانا اسحاق گیٹ کے پاس ایک قتل کی واردات پیش آئی تھی، جس میں کچھ افراد کے ذریعہ رفیق خان انور خان نامی نوجوان کو بے رحمی سے قتل کرنے کا واقعہ پیش آیا، قتل کی اس واردات نے آناً فاناً شہر بھر میں سنسنی خیز ماحول پیدا کر دیا تھا۔ واردات کی خبر ملتے ہی شہر ایڈیشنل ایس پی انیکیت بھارتی نے موقع پر حاضر ہوتے ہوئے کرائم اسپاٹ کا جائزہ لیا تھا۔
یہ بھی پڑھیں:
وہیں موقع پر موجود علاقہ کے ذمہ داران نے علاقے میں پنپ رہے جرائم اور بڑھتی نشہ آور اشیاء پر قدغن لگانے کے لیے انتظامیہ سے کومبنگ آپریشن کیے جانے کا مطالبہ کیا۔ دوسری جانب اس قتل کے فرار ملزمان کو گرفتار کرنے کے لیے پولیس نے سرچ آپریشن جاری کردیا ہے، وہیں اس دوران خفیہ خبر موصول ہوئی کہ قتل میں شامل ایک ملزم رفیق شاہ امین شاہ عرف لمبو منماڑ ریلوے اسٹیشن کی جانب جارہا ہے۔
ذرائع سے خبر ملتے ہی ضلع ایس پی وکرم دیشمانے کی رہنمائی میں شہر ایڈیشنل ایس پی انیکیت بھارتی اور ڈی وائی ایس پی سورج گنجال کی نگرانی میں لوکل کرائم برانچ پی آئے راجو سُروے، پی آئے سندیپ پاٹل و ان کی ٹیم نے جال بچھا کر واردات کے 2 گھنٹے میں ہی ملزم رفیق شاہ کو گرفتار کرنے میں کامیابی حاصل کی، قتل معاملہ میں مزید گرفتاریاں ہونے کا امکان ہے۔ واضح رہے کہ اس معاملے میں چھاؤنی پولیس نے گناہ رجسٹر نمبر 117/024 قلم 302 ، 504 ، 506 اور 34 کے تحت مقدمہ درج کیا ہے، دیگر تحقیقات پولیس کررہی ہے۔
