اورنگ آباد: مہاراشٹرا میں کولہاپور کے وشال گڑھ میں پیش آئے واقعہ کے خلاف اورنگ آباد شہر میں کل ہند مجلس اتحاد المسلمین کی جانب سے آج بعدنماز جمعہ ڈویژنل کمشنر آفس کے روبرو احتجاجی مظاہرہ کیا گیا۔ یہ احتجاج اے ائی ایم ائی ایم کی ریاستی صدر امتیاز جلیل کی قیادت میں کیا گیا، اس احتجاج میں بڑی تعداد میں مسلم نوجوانوں نے شرکت کی، اس دوران متعدد افراد نے حکومت کے خلاف زبردست نعرے بازی کی۔
اورنگ آباد کے ڈویژنل کمشنر آفس کے باہر اے ائی ایم ائی ایم کے سینکڑوں کارکنان نے وشال گڑھ میں ہوئے واقعے کی پرزور مذمت کرتے ہوئے احتجاجی مظاہرہ کیا۔ اس موقع پر صحافیوں سے بات کرتے ہوئے امتیاز جلیل نے کہا کہ ’کولہاپور کے وشال گڑھ میں ناجائز قبضہ جات کا معاملہ تھا، لیکن جس طرح تشدد کیا گیا اور مسجد میں توڑ پھوڑ کی گئی، اس سے صاف ظاہر ہوتا ہے کہ اشرار کی جانب سے صرف مسلمانوں کو نشانہ بنایا گیا۔ امتیاز جلیل نے کہا کہ واقعہ کے وقت پولیس کی خاموشی بھی معنیٰ خیز ہے۔
انہوں نے کہا کہ کولہاپور واقعہ کے خلاف مجلس کی جانب سے آج پوری ریاست میں احتجاج منظم کیا گیا۔ مختلف اضلاع میں مظاہرے کئے گئے۔ انہوں نے حکومت سے اشرار کے خلاف سخت کاروائی کرنے اور مسلم خاندانوں کو تحفظ فراہم کرنے کا مطالبہ کیا۔
