وارانسی : جمعرات کی شام نئی دہلی سے وارانسی آنے والی انڈیگو ایئر لائن کی پرواز میں زبردست ہنگامہ ہوا۔ دراصل فلائٹ کا اے سی کام نہیں کر رہا تھا، جس کا نتیجہ یہ نکلا کہ تین خواتین مسافروں کی طبیعت بگڑ گئی جبکہ ایک خاتون مسافر بے ہوش ہوگئی۔ مسافروں نے 1 گھنٹہ 5 منٹ کا سفر خود کو سنبھالتے ہوئے طئے کیا۔ لینڈنگ کے بعد مسافروں نے ہوائی اڈے پر حکام سے اس کی شکایت کی۔ طیارے میں ہنگامہ آرائی کی ویڈیو بھی وائرل ہوئی ہے۔ تاہم ای ٹی وی بھارت وائرل ویڈیو کی تصدیق نہیں کرتا ہے۔
انڈیگو ایئر لائنز کی پرواز 6-E 2235 جمعرات کو شام 7.35 بجے نئی دہلی سے وارانسی کے لیے ٹیک آف کرنے والی تھی۔ اس دوران مسافروں نے شکایت کی کہ اے سی کام نہیں کر رہا ہے۔ مسافروں نے گرمی اور دم گھٹنے کی شکایت کی۔ اس پر عملے کے رکن نے دعویٰ کیا کہ اے سی جلد ٹھیک کر دیا جائے گا۔ لیکن بتایا جارہا ہے کہ اے سی کی مرمت کئے بغیر ہی رات 7.35 بجے دہلی سے وارانسی کے لیے پرواز روانہ ہوگئی۔
وارانسی کے رہائشی امت سنگھ نے بتایا کہ جب طیارہ ٹیک آف کرنے کی تیاری کر رہا تھا تو اے سی کام نہیں کر رہا تھا۔ مسافروں نے ایئر لائن سے شکایت کی۔ جواب ملا کہ ٹیک آف کے بعد سب ٹھیک ہو جائے گا، لیکن پورے سفر میں اے سی نے کام نہیں کیا جس کی وجہ سے ایک خاتون مسافر بے ہوش ہو گئی۔ ساتھ ہی دم گھٹنے کی وجہ سے کئی مسافروں کی صحت بگڑ گئی، جس سے مشتعل مسافروں نے ہنگامہ کیا۔
